Առատ շպար և հիջաբ. աֆրիկացի տղամարդիկ փորձել են Դուբայ հասնել՝ ներկայանալով որպես արաբ կանայք

Ալժիրում ձերբակալել են աֆրիկացի 3 տղամարդու, որոնք, կրելով հիջաբ, ներկայացել են որպես արաբ կանայք և փորձել են գնալ ԱՄԷ Դուբայ քաղաք։ Խորամանկ տղամարդիկ իրենց տեսքն ամբողջացնելու համար դեմքը պատել էին տոնային քսուքի հաստ շերտով և աչքի հատվածում գործածել սև մատիտ, սակայն այս ամենը բավարար չի եղել։

Ինչպես գրում է Oddity Central-ը, եռյակը կասկածի տակ է հայտնվել այն բանից հետո, երբ անվտանգության աշխատակիցները նկատել են, որ նրանք դժվարությամբ են ծածկում իրենց դեմքը և չեն կարողանում ճիշտ կրել հիջաբը։ 

Հարավաֆրիկյան Kaya 959 լրատվականը հայտնում է, որ տղամարդիկ ցանկանում էին գնալ Դուբայ՝ բարեկեցիկ կյանք ստեղծելու հույսով: Ըստ լրատվականի՝ դեռևս պարզ չէ՝ ինչ պատիժ է սպառնում նրանց, սակայն հայտնի է, որ նրանց կվերադարձնեն իրենց երկիր:

Խորամանկ եռյակի լուսանկարները շուրջ մեկ շաբաթ է՝ քննարկվում են սոցցանցերի աֆրիկյան և արաբական տիրույթներում և արժանանում տարբեր արձագանքներին: 

Որոշները նշում են, որ ամաչում են նրանց արարքից, մյուսները՝ հակառակը․ կարծում են, որ տղամարդիկ վարվել են շատ խորամանկ։