Հռոմում կայծակը հարվածել է Կոստանդիանոսի հաղթակամարին և վնասել այն

Հռոմում ամպրոպի ժամանակ կայծակը հարվածել է Կոստանդիանոսի հաղթակամարին՝ մ.թ. 4-րդ դարում կանգնեցված հնագույն հուշարձանին, որը գտնվում է Իտալիայի մայրաքաղաքի գլխավոր զբոսաշրջային վայրերից մեկի՝ Կոլիզեումի մոտակայքում։ Այս մասին հաղորդում է Reuters գործակալությունը։

Կոլիզեումի հնագիտական ​​զբոսայգու վարչակազմը Reuters-ին հաստատել է, որ միջադեպի հետևանքով կամարի մի փոքր հատված վնասվել է։

«Կայծակը հարվածեց կամարին հենց այստեղ, այնուհետև դիպավ անկյունին, և մենք տեսանք՝ ինչպես այս կտորը պոկվեց ընկավ», – Reuters-ին ասել է ականատեսներից մեկը՝ մատնացույց անելով քարի մեծ բեկորը, որն ընկել է կառույցի մոտ:

Կոլիզեումի հնագիտական ​​զբոսայգու ղեկավարությունը վստահեցնում է, որ «բոլոր բեկորները հայտնաբերվել են և ապահով են»։

«Մենք արդեն սկսել ենք վնասի գնահատումը և վաղն առավոտյան կշարունակենք վերլուծությունները», – հայտնել են զբոսայգուց։

Ինչպես նշում է Reuters-ը, կայծակը հարվածել է կամարի հարավային կողմին, որտեղ երկու օր առաջ սկսվել էին նախապես ծրագրված վերականգնման աշխատանքներ։ Այժմ փորձագետները նաև պետք է վերականգնեն կայծակի հետևանքով վնասված հատվածը։

Հաղթակամարը կառուցվել է մ.թ. 315 թվականին քրիստոնեությունն ընդունած Հռոմի կայսր Կոստանդիանոսի կողմից՝ ի հիշատակ Մաքսենցիուսի նկատմամբ տարած հաղթանակի։ Այն ունի 25 մ բարձրություն։

Հռոմում ամպրոպը տապալել է նաև ծառեր, մի քանի փողոցներ հեղեղվել են։