Գյումրիում ձևավորվել է առաջատարների քառյակը

Մարտի 30-ին Գյումրիում տեղի կունենան համայնքի ղեկավարի արտահերթ ընտրությունները։ Չնայած այն հանգամանքին, որ մինչ այս պահը դեռևս ոչ բոլոր թեկնածուներն են գրանցված, այնուամենայնիվ քաղաքն արդե նախընտրական տրամադրության մեջ է։

Գյումրու փողոցներում արդեն իսկ տեղադրված են տարբեր գործիչների լուսանկարներով պաստառներ, իսկ քաղաքական ուժերը՝ զբաղված են նախընտրական ցուցակների հստակեցմամբ և ընտրական շտաբերի ձևավորմամբ։

Մինչ տարբեր թեկնածուները նախապատրաստական աշխատանքներ են տանում՝ հանրությունն ու փորձագիտական շրջանակները խոսում են այս կամ այն գործչի՝ ընտրություններում հաջողության հասնելու շանսերի մասին։

Քարոզարշավը դեռ չի մեկնարկել, բայց առաջատարների քառյակն արդեն ձևավորված է՝ Մարտուն Գրիգորյան, Ռուբեն Մխիթարյան, Վարդան Ղուկասյան և ՔՊ-ական Սարիկ Մինասյան։

Նշված թեկնածուների՝ վերջին օրերին տրված հարցազրույցներն ու հանդիպումներն արդեն իսկ պարզ են դարձնում, թե ինչպիսին կլինի նախընտրական պայքարը։ ՔՊ-ական Սարիկ Մինասյանի հույսն Նիկոլ Փաշինյանի աջակցությունն ու վարչական ռեսուրսն են։ Վարդան Ղուկասյանը հենվում է աղմկահարույց հայտարարություններով սեփական անձի վրա ուշադրություն գրավելու մարտավարության վրա։ Ռուբեն Մխիթարյանն աշխատում է քաղաքի ակտիվ հատվածի, ինչպես նաև մինչ այս պահն ընտրություններին չմասնակցող հանրության շերտերի ուղղությամբ։ Իսկ ահա Մարտուն Գրիգորյանի ռեսուրսը բազում տարիներ շարունակ Գյումրում իրականացրած գործերն ու դրանց արդյունքում ձևավորված թիմը, երիտասարդությունն ու կողմնակիցների մեծ բանակն է։

Մարտի 5-ի երեկոյան պարզ կդառնա, թե ի վերջո քանի թեկնածու է գրանցվելու Գյումրու համայնքապետի ընտրություններին և քաղաքական որ ուժերն են սատարելու նրանց։ Նախընտրական քարոզարշավը պաշտոնապես մեկնարկելու է մարտի 15-ին։