Ռուսաստանն ավելի է ակտիվանում Հայաստանում

Վերջին երկու շաբաթվա ընթացքում իր համար աննախադեպ ակտիվություն է ցուցաբերում Ռուսաստանի Դաշնության դեսպան Սերգեյ Կոպիրկինը, որը հանդիպել է բոլոր 3 նախկին նախագահների հետ։ Որոշ հանդիպումների մասին հանրությունը տեղեկացվել է, որոշ հանդիպումների մասին որևէ տեղեկություն չի եղել։ Դեսպանը նաև հանդիպել է քաղաքական դաշտում ընդդիմության հետ առնչվող ամենաակտիվ գործիչների հետ։ Փաստացի, դեսպան Կոպիրկինը Մոսկվայից հրահանգ է ստացել ակտիվ հանդիպումներ անցկացնել, կոնսուլտացիաներ սկսել ընդդիմադիր դաշտի բոլոր քիչ թե շատ նշանակալից ազդեցիկ գործիչների հետ։

Բացի դրանից, Կոպիրկինը հրահանգ է ստացել հանրային դաշտում, մեդիա դաշտում ակտիվ լինել և վերջերս հարցազրույցներ տալիս տարբեր ռեսուրսների, կարելի է ենթադրել, որ Ռուսաստանը տարածաշրջան է փորձում վերադառնալ, մասնավորապես Հայաստան, ամբողջ թափով, սպեկտրով։ Անգամ գործող դեսպանը, որը ոչ միանշանակ է ընդունվում ընդդիմադիր դաշտում, պարտադրված է ակտիվանալ, հատկապես միջազգային ասպարեզում գրանցվող փոփոխությունների, նոր տրամադրությունների պարագայում։

Առաջիկայում, մեր տեղեկություններով, ՌԴ-ն ավելի ակտիվ է լինելու Հարավային Կովկասում, իսկ ռուսական փափուկ ուժն ավելի ակտիվ է գործելու։ Մոսկվան հրաշալի հասկանում է, որ նախագահ Թրամփի պաշտոնավարման պայմաններում այժմ ավելի մեծ հնարավորություններ է ստացել ազդելու թե՛ Հայաստանի, թե՛ տարածաշրջանի այլ երկրների վրա։ Դա հասկանում են նաև երկրների ղեկավարները, որոնք ընդհանրապես դադարեցրել են հակառուսական տրամադրություններ տարածելը։

Մերի Մովսիսյան