Ջերմուկի 33-ամյա բնակիչը գողացել է ոսկյա և արծաթյա ավելի քան 30 զարդ

Նոյեմբերի 4-ին Քրեական ոստիկանության Երևան քաղաքի վարչության սեփականության դեմ ուղղված հանցագործությունների դեմ պայքարի բաժնում ստացված օպերատիվ տեղեկությունն իրացվեց ժամը 19.35-ին:

Երևանի քրեական ոստիկանները Առինջի Դուրյան թաղամասում, բնակարանային գողություն կատարելու կասկածանքով, ձերբակալեցին և իր վարած «Հյունդայի» մակնիշի ավտոմեքենայով հանդերձ վարչություն տեղափոխեցին Ջերմուկ քաղաքի բնակիչ 33-ամյա տղամարդու:

Նա խոստովանեց, որ մոտ մեկ ժամ առաջ նույն թաղամասի 6-րդ փողոցի մի տան հետնամասի դուռը հարմարեցված առարկայով բացել ու գողացել է զարդեր, այլ իրեր ու թղթադրամեր։
Քրեական ոստիկանության Կոտայքի մարզային վարչությունում տանտիրոջից ընդունվեց հաղորդում։

Պարզվեց, որ Ջերմուկի 33-ամյա բնակիչը գողացել է ոսկյա և արծաթյա ավելի քան 30 զարդ, այլ իրեր, ինչպես նաև արտարժույթով թղթադրամներ։

Գողոնը հայտնաբերված է։

Տղամարդը խոստովանել է նաև, որ այս տարվա սեպտեմբերից առ այսօր ապօրինի մուտք է գործել մայրաքաղաքում գտնվող ևս հինգ առանձնատուն, որոնցից չորսից, իր կամքից անկախ հանգամանքներում, հեռացել է ձեռնունայն:

Կազմված փաստաթղթերը փոխանցվել են Աբովյանի քննչական բաժին։ Հանգամանքները պարզվում են:

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: