Սնանկության կառավարչի կողմից սնանկ ճանաչված պարտապանի գույքն օտարվել է անշահավետ պայմաններով. հարուցվել է քրգործ

ՀՀ դատախազությունը տեղեկացրել էր, որ սնանկության գործընթացները հաճախ ուղեկցվում են սնանկության գործերով կառավարիչների մասնակցությամբ հանցավոր մեխանիզմներով՝ կոչ անելով ֆիզիկական եւ իրավաբանական անձանց սնանկության գործընթացների շրջանակներում օրենսդրության պահանջների առերեւույթ խախտումների, հանցավոր դրսեւորումների, սնակության կառավարիչների հնարավոր ոչ իրավաչափ գործողություններին առնչվելու դեպքում այդ տվյալներն անհապաղ հասու դարձնել ՀՀ դատախազությանը կամ այլ իրավապահ մարմինների: Այս մասին հայտնում են Դատախազության հանրային կապերի բաժնից։

ՀՀ գլխավոր դատախազության պետական շահերի պաշտպանության վարչությունում ուսումնասիրություն է իրականացվել ՀՀ դատախազություն դիմած՝ սնանկության գործով պարտապան հանդիսացող անձի կողմից ներկայացված հանգամանքների կապակցությամբ: Ուսումնասիրության համակողմանիությունն ապահովելու նպատակով վերաբերելի անհրաժեշտ փաստաթղթեր ու տվյալներ են պահանջվել եւ ստացվել նաեւ ՀՀ կադաստրի պետական կոմիտեից եւ տվյալ գործով սնանկության կառավարիչից:

Արդյունքում փաստական տվյալներ են ստացվել այն մասին, որ ՀՀ Արմավիրի մարզի ընդհանուր իրավասության առաջին ատյանի դատարանը 2017թ. հունվարի 11-ի վճռով բավարարել է ՀՀ ԿԱ ՊԵԿ դիմումը եւ «Ջրհան» ՓԲԸ-ին ճանաչել է սնանկ:

Արմավիրի մարզի Գեղակերտ համայնքի, Մ. Մաշտոցի փողոցում գտնվող՝ նշված ընկերությանը պատկանող 2,88566 հա արդյունաբերության, ընդերքօգտագործման եւ այլ արտադրական նշանակության հողամասի եւ 3939.51 քմ արտադրական նպատակային նշանակության շենք շինությունների շուկայական արժեքը գնահատվել է 50.400.000 ՀՀ դրամ, որը 2019թ. հոկտեմբերի 22-ին օտարվել է ընդամենը 6.808.645 ՀՀ դրամով: Անշարժ գույքի նկատմամբ իրավունքների գրանցման վկայականում առկա են եղել նաեւ 365,5քմ մակերեսով ինքնակամ շինություններ, որոնք թեեւ չեն գնահատվել, սակայն նշված գույքերի հետ միասին փոխանցվել են գնորդին:

Սնանկության մասին ՀՀ օրենքի 47-րդ հոդվածի 3-րդ կետի համաձայն՝ «Պարտապանին պատկանող գույքի տնօրինումը նրա լուծարման մասին որոշում կայացնելուց հետո իրականացնում է կառավարիչը»:

Այսինքն սնանկության կառավարիչը, օժտված լինելով գույքի տնօրինման գործառույթով, նախքան գույքի օտարումը չի իրականացրել պարտապանին սեփականության իրավունքով պատկանող հողամասի վրա առկա գույքի շուրջ 10%-ը կազմող 365,5քմ մակերեսով ինքնակամ շինությունների պետական գրանցում, որի հետեւանքով առանց իրական շուկայական արժեքը որոշելու, ակնհայտ անշահավետ պայմաններով օտարել է այն՝ պարտատերերին, այդ թվում՝ պետությանը պատճառելով 5.400.000 ՀՀ դրամի խոշոր չափի վնաս: Մինչդեռ գրանցման արդյունքում էականորեն կավելանար գույքի արժեքը եւ պահանջարկը:

Ընդ որում, օտարված Գույքի ծավալի կազմում առկա է եղել նաեւ 90 մետր խորությամբ եւ 219 մմ խողովակներով եւ զտիչներով ամրակապված խորքային հոր, որը չի ներառվել գույքագրման ակտում եւ չի գնահատվել, ինչը եւս էականորեն նվազեցրել է գույքի արժեքը:

Նկատի ունենալով, որ ուսումնասիրությամբ ձեռք են բերվել սնանկության ընթացքում անօրինական գործողություններ կատարելու, մասնավորապես՝ ակնհայտ անշահավետ պայմաններով գույքն օտարելու առերեւույթ հանցավոր արարքների հատկանիշներ պարունակող տվյալներ՝ ՀՀ գլխավոր դատախազության պետական շահերի պաշտպանության վարչությունում հարուցվել է քրեական գործ՝ ՀՀ քրեական օրենսգրքի 192-րդ հոդվածի 1-ին մասով:

Նախաքննություն կատարելու հանձնարարությամբ քրեական գործն ուղարկվել է ՀՀ քննչական կոմիտե: