Պուտինը պատրաստել է զորքը Բելառուս մտցնելու համար

Ռուսաստանը Բելառուսի նախագահ Լուկաշենկոյի խնդրանքով պատրաստել է իրավապահ զորք, որպեսզի հարկ եղած դեպքում այն ուղարկի Բելառուս, հայտարարել է ՌԴ նախագահ Պուտինը Ռոսիա հեռուստաընկերությանը տված հարցազրույցում: ՌԴ նախագահը նշել է, թե առայժմ չկա դրա կարիքը, բայց զորքը պատրաստ է, եթե ցուցարարներն անցնեն սահմանն ու սկսեն ավազակություն:

Թե ինչու՞ պետք է Բելառուսում արդեն տեւական ժամանակ բացառապես խաղաղ ցույց իրականացնող հանրությունը դիմի ավազակության, թերեւս հայտնի է միայն Պուտինին: Ըստ ամենայնի, Բելառուսի հանրությանը հարկ է բազմապատկել զգոնությունը, քանի որ ՌԴ նախագահի հայտարարության մեջ ակնառու է սադրանքի հավանականության էական ռիսկ:

Միեւնույն ժամանակ, Ռուսաստանի նախագահն ըստ երեւույթին էապես բարձրացնում է Բելառուսում տեղի ունեցողի գինը: Դրանում նշանակալի դեր է խաղում այն, որ Արեւմուտքն էլ զգալիորեն բարձրացրել է ռուսաստանցի ընդդիմադիր գործիչ Նավալնու գինը: Ինչպես հայտնի է, Նավալնին օրեր առաջ առողջական վիճակի կտրուկ անկումով եւ գիտակցության կորստով հոսպիտալացվել էր: Նավալնին տեղափոխվեց Բեռլին, որտեղ հոսպիտալային ուսումնասիրությունից հետո հաստատեցին, որ նրան թունավորել են:

Կրեմլը հերքում է, թե որեւէ առնչություն է ունեցել Նավալնու հետ կատարվածին կամ ունեցել է որեւէ շահագրգռություն: Միաժամանակ, Արեւմուտքն ուժգնացնում է ճնշումն ու արդեն քննարկում Նավալնու գործի առիթով Ռուսաստանի հանդեպ պատժամիջոց կիրառելու հարցը:

Բելառուսն ու Նավալնին «զարգանում» են զուգահեռաբար: Բելառուսի շուրջ իրողություններում ակնառու դարձավ, որ Պուտինն այդ տարածքը դիտարկում է Արեւմուտքին «քաղաքական առեւտրի» ներքաշելու յուրօրինակ խայծ: Դա կարծես թե ստացվում էր: Այդ ֆոնին Նավալնու առողջական վիճակի կտրուկ վատթարացումը, որը թվում է բերում է Կրեմլի հանդեպ միարժեք մեղադրանքի կամ առնվազն կասկածի, կարծես թե այդքան էլ միարժեք չէ:

Կրեմլին ինչու՞ էր պետք թունավորել Նավալնուն: Հետո նրան Արեւմուտք բաց թողնելու եւ դրա դիմաց նոր պատժամիջոցների սպառնալիք ստանալու համա՞ր: Այն դեպքում, երբ Պուտինին օդ ու ջրի պես պետք են հենց տարածքներ եւ թեմաներ, որոնք թույլ կտան Արեւմուտքի հետ բանակցել կամ «առեւտուր» անել ղրիմ-ուկրաինական պատժամիջոցների ծանրությունը թեթեւացնելու համար: Բելառուսն այդ իմաստով ՌԴ նախագահը փորձում էր վերածել նոր տարածքի: Բայց, Նավալնու առողջությունը կարծես թե որոշակի խառնել է խաղաքարտերը, եւ Պուտինը ստացել է պատժամիջոցների նոր սպառնալիք: Ըստ ամենայնի, այդ ֆոնին նա որոշում է Բելառուսի հարցում բարձրացնել գինը, որպես Նավալնու հարցում արեւմտյան ճնշումների «հակաթույն», հայտարարելով, որ մտադիր է Բելառուսում կիրառել զորք: