Հարսնացուն սրտի կաթված է ստացել սեփական հարսանիքի ժամանակ

Իսրայելի Սդոտ Նեգեւ շրջանից 33-ամյա հարսնացուն սրտի կաթված է ստացել սեփական հարսանիքի ժամանակ: Այս դեպքի մասին պատմում է The Daily Mail-ը:

Պարբերականի փոխանցմամբ` օգոստոսի 30-ին հարսնացուն ուշագնաց է եղել մասնավոր տան պարտեզում հարսանեկան արարողության ժամանակ: Ինչպես պարզվել է, նա սրտի կաթված է ստացել: Հյուրերի թվում բժիշկներ կային, ովքեր մինչ շտապօգնության ժամանումը կարողացել են նրան ժամանակին առաջին բուժօգնություն ցուցաբերել:

Հարսնացուն, ով ինքը որպես բժիշկ է աշխատում, ծայրահեղ ծանր վիճակում տեղափոխվել է Բեր-Շեվա նահանգի Soroka Medical Center: Հիվանդանոցի ճանապարհին նրան վերակենդանացման միջոցառումներ էին անհրաժեշտ եղել:

Այժմ նա գտնվում է սրտաբանական բաժանմունքի վերակենդանացման հիվանդասենյակում:

Նշենք, որ Իսրայելում հարսանիքներն այժմ անցկացվում են մասնավոր տներում, քանի որ հարսանիքների սրահները փակ են կորոնավիրուսի համավարակի պատճառով: Համավարակից առաջ Իսրայելում ընդունված էր հարսանիքները նշել մեծ թվով հյուրերով, բայց այժմ հարսն ու փեսան իրավունք ունեն յուրաքանչյուր կողմից հրավիրել ոչ ավելի, քան 20 մարդ:

Իմանալ ավելին․․․