Արաս Օզբիլիսը՝ խաղադաշտ կառուցելու, հավաքական չհրավիրվելու ու բակային ֆուտբոլի կարևորության մասին (ֆոտո)

Երևան քաղաքի Ավան վարչական շրջանի Ծարավ աղբյուր 55/8 հասցեում սեպտեմբերի 13-ին բացվել է բակային ֆուտբոլային խաղադաշտ, որի շինարարական աշխատանքները ֆինանսավորել է ֆուտբոլի Հայաստանի ազգային հավաքականի և Երեւանի «Փյունիկի» կիսապաշտպան Արաս Օզբիլիսը: 30-ամյա ֆուտբոլիստը բնակվում է այդ բակում և խաղադաշտի բացման արարողությանը ներկա էր կնոջ ու 2 որդիների հետ:

NEWS.am Sport-ի թղթակցի հետ զրույցում Արաս Օզբիլիսը պատմեց, թե ինչպես է առաջացել խաղադաշտ կառուցելու գաղափարը և խոսեց բակային ֆուտբոլի կարևորության մասին:

«Այդ տարածքում երկար տարիներ կար խաղահրապարակ, բայց որոշվել էր, որ պետք է կառուցվի ֆուտբոլային խաղադաշտ, քանի որ երեխաները բակում ֆուտբոլ էին խաղում մեքենաների մոտ: Ես նույնպես ցանկացա ունենալ իմ ներդրումը և այս խաղադաշտը նվիրել մեր թաղամասին:

Բակային ֆուտբոլի առաջընթացը շատ կարևոր է ֆուտբոլի զարգացման համար: Ինքս ֆուտբոլ խաղալ սովորել եմ բակում: Հիշում եմ, որ մինչև գիշերվա ուշ ժամերը ֆուտբոլ էինք խաղում բակում: Նույնիսկ դպրոցի դասերից ու մարզումներից հետո շտապում էինք բակ՝ ֆուտբոլ խաղալու համար: Բակային ֆուտբոլում շատ բան կարող ես սովորել»,- նշեց Արաս Օզբիլիսը:

Արաս Օզբիլիսն ունի 2 որդի՝ Առաքելը և Լևոնը: Հարցին, թե արդյոք նա կցանկանար, որ որդիները գնային հոր ճանապարհով և դառնային ֆուտբոլիստ, կիսապաշտպանը նշեց հետևյալը.

«Դա իմ ուզելով չէ, առաջին հերթին նրանք պետք է ցանկանան: Ժամանակը ցույց կտա: Ավագ որդիս՝ Առաքելը, ավելի շատ սիրում է մեքենաներ և հեծանիվ, իսկ փոքր որդիս սիրում է գնդակով խաղալ: Եթե նրանք սիրեն, անպայման կտանեմ ֆուտբոլի մարզումների: Ամեն բան կախված է նրանց ցանկությունից»,- ասաց Օզբիլիսը:

Արաս Օզբիլիսը չցանկացավ նշել, թե որքան գումար է ծախսվել խաղադաշտի կառուցման համար. «Դա կարևոր չէ: Կարևորն այն է, որ երեխաներն ուրախացել են և հաճույք են ստանում: Երբ տեսնում ենք նրանց ժպիտը, դա ամեն ինչ է մեզ համար»:

Հայաստանի հավաքականի ֆուտբոլիստն ազգային թիմից հրավեր չէր ստացել Ազգերի լիգայի մեկնարկային 2 տուրերի խաղերի համար: Օզբիլիսի խոսքով՝ այս պահին նա լավ մարզավիճակում է և միշտ պատրաստ է օգտակար լինել հավաքականին, սակայն չի զրուցել ազգային թիմի նորանշանակ գլխավոր մարզիչ Խոակին Կապառոսի հետ և չգիտի հավաքական չհրավիրվելու պատճառը:

«Մինչև օրս ոչ մի անգամ չեմ զրուցել մարզիչի հետ: Լսել եմ, որ նա ասել է, որ ես պատրաստ չեմ, թեև հավաքականի հայտացուցակում կային խաղացողներ, որոնք ակումբ չունեն, բայց հրավիրվել են: Ամեն դեպքում, դա որոշում է մարզիչը և մենք՝ որպես ֆուտբոլիստ, չենք կարող որևէ բան փոխել: Միայն կարող եմ ասել, որ միշտ լավագույնն եմ ցանկանում Հայաստանի հավաքականին: Եթե թիմը կարող է հաջողության հասնել առանց ինձ, ոչ մի խնդիր չեմ տեսնում այդտեղ: Ես այս պահին լավ վիճակում եմ, բոլոր խաղերում էլ հանդես եմ գալիս 90 րոպե և ֆիզիկապես շատ լավ եմ զգում ինձ: Խաղից խաղ ավելի լավ մարզավիճակ եմ հավաքում: Հավաքական էին հրավիրվել ֆուտբոլիստներ, որոնք նույնիսկ մեկ խաղ չեն անցկացրել, բայց ես խնդիր չեմ տեսնում, ամեն բան մարզիչն է որոշում: Կարող եմ ասել, որ միշտ պատրաստ եմ օգտակար լինել հավաքականին»,- խոսքը եզրափակեց Արաս Օզբիլիսը:

Նշված բակում խաղադաշտ կառուցելու նախաձեռնությունը պատկանում էր «Ծարավ աղբյուր» համատիրությանը: Համատիրության նախագահ Էմիլ Սարգսյանը NEWS.am Sport-ի թղթակցի հետ զրույցում նշեց, որ շինարարական աշխատանքների մեկնարկից հետո Արաս Օզբիլիսը հայտնել է օժանդակելու ցանկություն:

«Նախորդ տարի, երբ հաստատում էիք համատիրության՝ 2020 թվականի բյուջեն, կապիտալ ծախսերի մեջ ներառեցինք ֆուտբոլային խաղադաշտի կառուցումը: Գարնանը սկսեցինք նախապատրաստական աշխատանքները: Մինչև Արաս Օզբիլիսի՝ մեզ օգնելու ցանկություն հայտնելը համատիրությունը ծախսել էր 2 միլիոն 300 հազար դրամ: Հետո Արասի կինը մեր կառավարիչին հայտնեց, որ ֆուտբոլիստն իմացել է այդ մասին և ունի այդպիսի մտահղացում: Նա հայտնել էր, որ պատրաստ է այդ պահից սկսած բոլոր ծախսերը վերցնել իր վրա, կառուցել ֆուտբոլային խաղադաշտ և նվիրել մեր բակին: Դրանից հետո մենք հանդիպել ենք Արասի հետ, նրա շինարար ընկերը կատարել է հաշվարկներ և սկսել աշխատանքները, որոնք տևեցին մոտ 2 ամիս: Նախօրեին տեղի ունեցավ խաղադաշտի բացման արարողությունը, որը վարում էր մեր լավ ընկեր Էդուարդ Քալանթարյանը»,- նշեց Էմիլ Սարգսյանը:

Դավիթ Եղիազարյան