Նիկոլ Փաշինյանի նոր բացահայտումը. ինչ շարունակություն է լինելու

Վարչապետ Նիկոլ Փաշինյանի սեպտեմբերի 18-ի ֆեյսբուքյան գրառումը հնարավոր է հետհեղափոխական շրջանի համար դիտարկել շրջադարձային կետ, համենայն դեպս այն արձանագրումների տեսանկյունից, որ Փաշինյանը դրել էր գրառման թե բուն տեքստի, թե տողատակի իմաստով:

Կունենա՞ հանրության հետ երկխոսության կամ խոսակցության նոր բովանդակության ու տրամաբանության այդ մեկնակետը շարունակություն, եւ ինչ ձեւաչափով՝ այլ հարց է: Դա Նիկոլ Փաշինյանից կպահանջի քաղաքական համարձակություն, ինչին գնալը կախված կլինի քաղաքական անհրաժեշտությունից:

Այն, որ վարչապետն առնվազն բացում է այդ խոսակցությունը, դա անշուշտ եւս պայմանավորված է անհրաժեշտությամբ, որ հասունացել է արտաքին եւ ներքին քաղաքական բարդ շրջափուլում:

Ամիսներ առաջ, եւ մի քանի առթով Նիկոլ Փաշինյանը հայտարարել է, որ պետական կառավարման համակարգը դիմադրում է հեղափոխությանը, ընդ որում ոչ միայն զուտ գիտակցված սաբոտաժի, այլ նաեւ պարզապես մտածողության իմաստով:

Այստեղ խոշոր հաշվով չկար գաղտնիք: Առավել եւս, որ քաղաքական իմաստով էլ նախկին համակարգը բաց ռեժիմով եւ բաց խաղաքարտերով է դիրքավորվել Փաշինյանի դեմ:

Սեպտեմբերի 18-ի ելույթ-գրառումով Նիկոլ Փաշինյանը փաստացի բացահայտում է դիմադրության նոր կետ: Նրա գրառումը դե ֆակտո այն մասին էր, որ հեղափոխությանը դիմադրում է նաեւ նախկին ընդդիմությունը: Դրա վկայությունն էին Փաշինյանի մի քանի հիշատակումները՝ նախկին ընդդիմությունների եւ նախահեղափոխական «երիտասարդ ընդդիմություն» ՔՊ մտածողության տարբերության համատեքստում: Փաշինյանը հիշատակում էր ՀԱԿ-ԲՀԿ գործակցությունը, ՊՊԾ գնդի գրավումը, այլ դրվագներ, այդ համատեքստում իրեն տրվող գնահատականները, ակնարկելով, որ ներկայում իր քաղաքական կառավարման դեմ է ոչ միայն նախկին իշխող, այլ նախկին ընդդիմադիր համակարգը:

Հնարք եւ արդարացու՞մ է՝ պարբերաբար դիմադրության նոր բեւեռներ ու համակարգեր մատնանշելը հետհեղափոխական հանրային սպասումների եւ պահանջների հանդեպ, թե՞ խնդիրն այն է, որ դիմադրող համակարգերը ձեւավորում են սպասումներ, որոնք համարժեք չեն այն խնդիրներին, որ կան քաղաքական մեծամասնության առաջ:

Այդ դեպքում է հենց էական, թե ինչպես կշարունակի Փաշինյանը սեպտեմբերի 18-ի գրառումով իր իսկ բացած որակապես նոր խոսակցությունը, բացելով նաեւ այն խնդիրները, որ կան պետության առաջ եւ իր առաջ՝ որպես պետական քաղաքականության պատասխանատու: Դրանից է նաեւ պարզ դառնալու կամ բացվելու առկա մարտահրավերների, անելիքների, առաջնահերթությունների համատեքստում հանրային սպասումների եւ իրավիճակի հանրային գնահատման չափանիշների համարժեքության աստիճանը: