Կրակել են Սոթքի աշխատողների ուղղությամբ.

A1News.am-«Հրապարակ օրաթերթ»-ը գրում է.Երեկ ադրբեջանական զինուժը կրակոցներ է արձակել նաև Սոթք գյուղի ուղղությամբ։ Ոսկու հանքի աշխատողներին ուղարկել են տուն, քանի որ իրավիճակը լարված է եղել։ Այս մասին հայտնել են Սոթքի գյուղապետ Հակոբ Ավետյանն ու հանքը շահագործող «Գեոպրոմայնինգ» ընկերության ներկայացուցիչը։

Մեր տեղեկություններով, Սոթքի հանքավայրի աշխատողների ուղղությամբ նույնիսկ կրակ են բացել։ Այսօր նրանք դուրս են եկել աշխատանքի, սակայն ղեկավարությունը ստիպված է եղել համոզել մարդկանց, որ գործի գնան։ «Դա նույնն է, թե մարդկանց ստիպես, որ հրացանի փողի տակ աշխատեն։ Մարդիկ վախենում են», - ասում է աշխատողներից մեկը։

Video Player

Մենք փորձեցինք տեղեկություն ստանալ հանքի լրատվության պատասխանատուներից, բայց պարզվեց՝ ղեկավարությունը որոշել է ոչ մի տեղեկություն չհրապարակել, քանի որ այնտեղ համոզված են, որ ադրբեջանցիները հատուկ թիրախավորել են Հայաստանի տնտեսության մեջ մեծ դեր ունեցող հանքավայրը։

Ի՞նչ իրավիճակ է այսօր մարզում, արդյոք կա՞ն կուտակումներ, կրակոցներ եղե՞լ են։ Փաշինյանի նախկին թիմակից Էդգար Պետրոսյանը, որը մեկ տարի առաջ դուրս է եկել «Քաղաքացիական պայմանագիր» կուսակցությունից և բնակվում է Վարդենիսում, ասում է, որ կուտակումներ կան ոչ միայն ադրբեջանական, այլև հայկական կողմից։

«Այս պահին էլ կուտակումներ կան, բայց դրանք շատ չեն։ Երեկ կեսօրից են եղել, հավասարապես բոլոր կողմերում։ Բայց Վարդենիսում այս պահին վտանգ չկա»։

Ըստ նրա, կրակոցները շատ չեն եղել։ «Մեկ մեկ իրար վրա կրակել են, որովհետև ուզեցել են վախ տարածել»։ Վարդենիսում մարդիկ համոզված են, որ Սիսիանի մոտակայքում նախօրեի էսկալացիան Նիկոլ-Ալիև զույգի համատեղ մտածածն էր` հայության դիմադրությունը կոտրելու համար։