Նիկոլը խճճվել է իր ստերի մեջ. ուզում է պոկվել Մոսկվայից և փրկօղակ գտնել Արևմուտքում. Վահե Հակոբյան

Բանախոսը նշել է.

• Ես երեկ նոր տեսակի Փաշինյան տեսա, որով պետք է զբաղվեն ոչ թե իրավապահ մարմինները, այլ ուրիշ՝ առողջության կամ առողջության բացակայության հետ առնչություն ունեցող մասնագետներ:

• Նիկոլ Փաշինյանը խախտել է Ադրբեջանի հետ դռնփակ ռեժիմով ձեռք բերված պայմանավորվածությունները, դրա ապացույցն են սահմանին տեղի ունեցած վերջին իրադարձությունները:

• Փոխելով Պաշտպանության նախարարին, բերեց իր համար վստահելի մի մարդու, որը ուղիղ կապ է հաստատում Թուրքիայի և Ադրբեջանի իր գործընկերների հետ: Դրանով գուցե փորձում է նաև Ռուսաստանին հետ պահել գործընթացներից:

• Պաշտպանության նախկին նախարար Արշակ Կարապետյանին պաշտոնից ազատելը Մոսկվայի հետ կապ ունի, կարծում եմ, Փաշինյանն ուզում է Արևմուտքում փրկօղակներ գտնել: Նիկոլն ուզում է պոկվել Մոսկվայից:

• Եթե մարդը ադեկվատ չի, դժվար է ասել, թե ինչ է կատարվում նրա գլխի մեջ:

• Ինքը շարունակում է պոպուլիստական՝ թոզ փչելու գիծը: Երեկվա ելույթով ինքն իրեն շատ ավելի բարդ իրավիճակի մեջ դրեց:

• Նոյեմբերի 26-ի հանդիպումից երկու ակնկալիք կա. կամ Սոչիում պարտադրելու են ինչ-որ փաստաթուղթ ստորագրել, կամ Ադրբեջանը նորից ստուգողական կրակոց կանի և կստանա այն, ինչ ուզում է:

• Ադրբեջանը 2020թ. նոյեմբերի 9-ի համաձայնագրի դրույթները չի կատարել, գերիներին չի վերադարձրել, զորքը պետք է մնար այնտեղ, որտեղ դիրքավորված էր այդ հայտարարությունը ստորագրելու պահին, այնինչ հայկական զորքը նահանջել է:

• Փաշինյանը արժեզրկել է Արցախը, պետական, ազգային շահը: Իրենք մեկ արժեք և մեկ նպատակ ունեն՝ պահել իրենց աթոռները:

• Նիկոլ Փաշինյանն ինքը քցող է, բոլորին խաբում է, դրա համար ինքն էլ ոչ մեկին չի հավատում. դա հոգեբանական վիճակ է:

• Փաշինյանը խճճվել է իր ստերի մեջ:

• Խաղի մեջ մտած պետությունները տարբեր հետաքրքրություններ ունեն. Ադրբեջանը պետք է ամեն ինչ անի, որ իր ուզածին հասնի, Ռուսաստանը պետք է ամեն ինչ անի, որ հարցը չլուծվի Բրյուսելում և արագ ստորագրվի փաստաթուղթը, Արևմուտքն ուզում է, որ վերջնական փաստաթուղթը ստորագրվի Բրյուսելում կամ Մինսկում: Բոլոր դեպքերում Փաշինյանին ստիպելու են փաստաթուղթ ստորագրել, ինքն էլ այնքան կամք չունի, որ դիմադրի:

• Այն, ինչ կատարվում է այսօր փողոցում՝ բնական երևույթ է, բողոքի ալիքը, համոզված եմ, կանի իր ասածը:

• Մենք առաջարկում ենք՝ կանգնեցնել պարտությունների շարքը, վերջ դնել պարտվողականությանը, հետո հասկանանք՝ որպես երկիր ո՞ր ուղղությամբ ենք գնում:

• Երկրի տնտեսության վիճակը կոլապսային է, ամբողջ հույսը դրված է հանքարդյունաբերության վրա, բայց Կառավարությունը օրենսդրական այնպիսի փոփոխություններ արեց և դեռ անելու է, որ հանքարդյունաբերության ոլորտը վերջնականապես քայքայվի:

• Բլեֆ է առկա տեխնոլոգիաներով պղնձաձուլարաններ կառուցելու մասին Փաշինյանի և նրա կառավարության անդամների հայտարարությունները: Իհարկե, կառուցել հնարավոր է, բայց մեր երկրի, քաղաքացիների համար հետևանքներն աղետալի կլինեն. ծանր թափոններն ի՞նչ են անելու, գի՞պս են արտադրելու: Հնարավոր է՝ գիպս էլ արտադրեն, բայց շատ վատ որակի, դա ի՞նչ են անելու, թաղելո՞ւ են… Հայաստանը դառնալու է մեծ գերեզմանոց:

• Կապանի օդանավակայանը գործարկելու մասին հայտարարությունը ևս բլեֆ էր, պոպուլիստական հնարք՝ Սյունիքում տեղի ունեցող ՏԻՄ ընտրություններից առաջ:

• Կառավարությունը ճնշումներ գործադրելով «Գեոպրոմայնինգ» ընկերության նկատմամբ՝ նրանից խլեց Զանգեզուրի պղնձամոլիբդենային կոմբինատի բաժնետոմսերի 15 տոկոսը:

• Օտարերկրյա կապիտալով Հայաստանում աշխատող ամենախոշոր հիմնարկը՝ Զանգեզուրի պղնձամոլիբդենային կոմբինատը, այսպես շարունակվելու դեպքում, կոլապսի մեջ կհայտնվի: Դրան կավելանա տնտեսական, քաղաքական, սոցիալական կրիզիսը, արդյունքում՝ այս ամենի դխկոցը մի տեղից դուրս է գալու…

• Ադրբեջանն իր ամենալավ երազում անգամ այսպիսի արդյունք չէր պատկերացնում, որ ստացավ Նիկոլի և նրա խմբակի շնորհիվ:

• Դժգույն, դժբախտ թեզը հիմա էլ Սյունիքի վրա է պրոյեկցիա անում: Հանրությունը պետք է հասկանա ու մտածի, որ այսպես շարունակվելու դեպքում հետևանքն ինչ է լինելու՝ թիկունքում Երևանն է, նահանջելու տեղ չկա:

• Գուցե պատահական չէր, որ Ռուսաստանի Դաշնության վարչապետ Միխայիլ Միշուստինի մեկնելուց առաջ Փաշինյանի հետ երեկոյան նախատեսված հանդիպումը չկայացավ, այն բանից հետո, երբ դրանից առաջ հրապարակվեց Ալիևի հետ Բրյուսելում հանդիպման մասին: Եվ Միշուստինը Երևանից Մոսկվա մեկնելուց առաջ Նիկոլ Փաշինյանի հետ հանդիպելու փոխարեն՝ գնացել էր ջազ ակումբ: