Զելենսկի. Մեզ ասում են, որ փետրվարի 16-ը հարձակման օր կդառնա, մենք այն Միավորման օր կդարձնենք

Նախագահ Վլադիմիր Զելենսկին ստորագրել է հրամանագիր, որի համաձայն փետրվարի 16-ը Ուկրաինայում հայտարարվել է Միավորման օր, հայտնում է NV.ua-ն։

Այդ օրը բոլոր բնակավայրերի շենքերի վրա պետք է բարձրացվի պետական դրոշը, ժամը 10:00-ին կհնչի Ուկրաինայի օրհներգը, իսկ օտարերկրյա դիվանագիտական ներկայացուցչությունները պետք է «իմիջային միջոցառումներ» անցկացնեն՝ Ուկրաինայի միավորման եւ աջակցության համար։

«Մեզ ասում են, որ փետրվարի 16-ը հարձակման օր կդառնա։ Մենք այն կդարձնենք Միավորման օր։ Համապատասխան հրամանագիրն արդեն ստորագրվել է։ Այդ օրը մենք կկախենք ազգային դրոշներ, կկրենք դեղնակապույտ ժապավեններ եւ մեր միասնականությունը ցույց կտանք ամբողջ աշխարհին»,- ընդգծել է նախագահը իր տեսաուղերձում։ «Մենք չենք հարձակվում ուրիշինի վրա, բայց նաեւ մերը չենք տա։ Մենք հիանալի բանակ ունենք։ Մեր տղաները մարտական հազվագյուտ փորձ եւ ժամանակակից զենքեր ունեն։ Սա արդեն շատ ավելի ուժեղ բանակ է, քան ութ տարի առաջ»,- ասել է նա, հայտնում է «112 Ուկրաինա» հեռուստաալիքը։

Նույն հրամանագրով Զելենսկին կառավարությանը հանձնարարել է միջոցներ ձեռնարկել 2022 թվականի մարտի 1-ից զինվորականների աշխատավարձերը 30%-ով բարձրացնելու, իսկ Պետական սահմանային ծառայության ու Ազգային գվարդիայի զինվորականների աշխատավարձերի բարձրացումը «2022 թվականի սկզբից 20%-ի հասցնելու» համար։