Հիմա էլ է ԳՇ պետը ենթակա պաշտպանության նախարարին. Արման Սարգսյան

Դա օրենքի նախագիծն է, իզուր են դրա մեջ տեսնում քաղաքական բաղադրիչ: Այս մասին, այսօր՝ փետրվարի 23-ին, ԱԺ-ում լրագրողների հետ զրույցում նշեց պաշտպանության փոխնախարար Արման Սարգսյանը՝ անդրադառնալով «Պաշտպանության մասին» օրենքում փոփոխություններին, որով մասնավորապես, ԶՈՒ գլխավոր շտաբի պետի պաշտոնը նախատեսվում է որպես ՀՀ պաշտպանության նախարարի առաջին տեղակալ:

«Հիմա էլ է ԳՇ պետը ենթակա, պաշտպանության նախարարին ենթակա է, որովհետեւ ԶՈՒ գլխավոր շտաբը ենթակա պետական մարմին է ՊՆ կազմում: Իսկ փոփոխությունները, ինչպես յուրաքանչյուր կառույցում, անընհատ իրականացվող քայլեր են: Օրենքի նախագիծը քննարկման փուլում է, այդ ամբողջ փոփոխությունն իրականացվում է ԶՈՒ մարտունակությունը եւ ՊՆ աշխատանքների արդյունավետությունն ապահովելու համար»,-ասաց նա:

Ինչ վերաբերում է ՊՆ-ում կադրային փոփոխություններին, Սարգսյանն ասաց. «Ես չեմ կարող գնահատել, թե ում ինչի համար են հանում, կարծում եմ՝ փոփոխություններն ինքնանպատակ չեն, նպատակ են հետապնդում աշխատանքներն ավելի արդյունավետ դարձնել»:

Ավելի վաղ NEWS.am-ը հայտնել էր, որ կառավարությունը շրջանառության մեջ է դրել «Պաշտպանության մասին» Հայաuտանի Հանրապետության օրենքում փոփոխությունների նախագիծ, որի համաձայն նախատեսվում է նոր խմբագրությամբ շարադրել պաշտպանության ոլորտում Կառավարության լիազորությունները, դրանցում առանձին սահմանել իրավասությունները, ավելացնել ՀՀ անվտանգության խորհրդի կողմից ընդունվող ակտերի շրջանակը, պաշտպանության և ՀՀ զինված ուժերի, այլ զորքերի, տնտեսության գործունեությունը, զորահավաքային նախապատրաստության և զորահավաքի բնագավառը կարգավորող մի շարք հիմնարար պլաններ և ծրագրեր ներառելով մեկ ընդհանուր՝ Հայաստանի Հանրապետության պաշտպանության պլանում, խմբագրվում և հստակեցվում են ՀՀ վարչապետի, ՀՀ պաշտպանության նախարարության և Զինված ուժերի գլխավոր շտաբի ու ՀՀ պաշտպանության նախարարի ու ԶՈՒ գլխավոր շտաբի պետի լիազորությունների շրջանակը, Զինված ուժերի գլխավոր շտաբի պետի պաշտոնը նախատեսվում է որպես ՀՀ պաշտպանության նախարարի առաջին տեղակալ, ինչպես նաև հիմքեր են ստեղծվում ՀՀ պաշտպանության նախարարի այլ տեղակալների պաշտոններն ըստ անհրաժեշտության ևս զինվորական պաշտոններ նախատեսելու ուղղությամբ, 2020 թվականին հայտարարված զորահավաքային զորակոչի վերլուծության արդյունքներով ավելանում են ընտանեկան որոշակի պայմաններ ունենալու դեպքում զորահավաքային զորակոչի ոչ ենթակա անձանց շրջանակը, աշխատողների ամրագրման գործընթացում սահմանվում է, որ ամրագրվում են պետության և բնակչության կենսական պահանջմունքների բավարարման ուղղությամբ տնտեսական և այլ բնույթի գործունեություն ծավալող կազմակերպությունների աշխատողները, անհրաժեշտ առանձնահատուկ կարգավորումներ են սահմանվում պետական կառավարման համակարգի գործունեությունը կարգավորող օրենքներում։