Արցախում ծայրահեղ ծանր վիճակ է

Արցախում ծայրահեղ ծանր վիճակ է։ Այս մասին MediaHub-ի հետ զրույցում ասաց Արցախի ԱԺ «Արդարություն» խմբակցության պատգամավոր Մետաքսե Հակոբյանը։

«Արցախում վիճակը ոչ թե վատ է, կամ ուղղակի լարված, այլ գերլարված է, և դա պատկերացնել ուղղակի անհնար է»,- ասաց Հակոբյանը։

Նրա խոսքով՝ այսօր Արցախում ավելի վատ իրավիճակ է ստեղծվել, քան պատերազմի օրերին էին։ «Արդեն երկրորդ անգամ Նիկոլ Փաշինյանը կառավարության նիստի ժամանակ հստակ մեսիջներ է ուղղում Ադրբեջանին, այս անգան նա իր ելույթում նշեց, թե ինչ վատ բաներ են սպասվում և վերջում ասաց, որ ամսի 6-ին գնում է Ալիևի հետ հանդիպման, օրակարգում լինելու է խաղաղության պայմանագիրն առանց նախապայմանների, մենք մինչ այսօր այդպես էլ չիմացանք՝ ինչ է նշանակում խաղաղության պայմանագիր առանց նախապայմանի։

Այս քայլերով իրենք հանգեցրին խուճապային իրավիճակի արցախցիների շրջանում»,-ասաց նա։

Հարցին՝ տեղեկությունը, որ Նիկոլ Փաշինյանի կառավարության նիստում հնչեցրած արտահայտությունը, այն մասին, որ Ադրբեջանը փորձում է Լեռնային Ղարաբաղի և ՀՀ-ի դեմ լայնամասշտաբ հարձակման լեգիտիմություն ձևավորել, Արցախում քաղաքացիներին խուճապի է մատնել, և շատերը հեռանում են Արցախից, Հակոբյանն ընդգծեց․

«Այնպես չէ, որ համատարած խուճապ է, բայց, այո, կան մարդիկ, որոնք չեն դիմանում այս լարվածությանը և մտածում են, որ իրենց ընտանիքը տեղափոխեն ավելի ապահով վայրեր, ինքս էլ չգիտեմ, որն է ավելի անվտանգ վայր, քանի որ Հայաստանն էլ չեմ համարում անվտանգ վայր։ Բայց այս անորոշ ու լարված իրավիճակում չեն էլ կարող իրենց երեխաներին թողնել վտանգի մեջ»։

Ավելին՝ այստեղ