Արցախի ժողովրդի ինքնորոշումը վիճարկման ենթակա չէ. «Համախմբում»

Արցախի ժողովրդի ինքնորոշումը բխում է միջազգային իրավունքի հիմնարարնորմերից և որևէ կերպ վիճարկման ենթակա չէ։

«Համախմբման շարժման» խորհուրդն է այս մասին հայտարարություն տարածել՝ արձագանքելով Արցախի Ազգային ժողովի հայտարարությանը, որը ի թիվս այլ հարցերի պահանջել է ՀՀ իշխանություններից բոլոր միջազգային հարթակներում հանդես գալ հայկական երկու պետությունների շահերը պաշտպանելու դիրքերից և կոչ է արել աշխարհասփյուռ հայությանը պաշտպանել Արցախի ժողովրդի իրավունքներն ու շահերը։

Ըստ «Համախմբում շարժման»՝ հայ ժողովուրդը մշտապես տեր է կանգնել արցախաբնակ իր հատվածի արդարացի պայքարին և շարունակելու է դա անել ՝անկախ հնարավոր դժվարություններից և վտանգներից։

Շարժումը, որի ղեկավար կազմում են հասարակական, քաղաքական գործիչ Ավետիք Չալաբյանը, Կարին Տոնոյանը, այլ անվանի հայորդիներ, արձանագրում է, թե Ադրբեջանի կողմից իրականացվող գործողությունները նպատակ ունեն Արցախի ժողովրդի հայրենազրկմանն ու ցեղասպանությանը և պետք է համարժեք ազդեցություն ստանան հայ ժողովրդի բոլոր հատվածների կողմից, այլապես նույն ճակատագիրը կսպառնա նաև Հայաստանի Հանրապետությանը։

Շարժումը փաստում է, որ Հայաստանի ցանկացած իշխանություն՝ առաջնորդվելով համազգային շարժումներովպարտավոր է հետևողականորեն առաջ մղել Արցախի ժողովրդի ինքնորոշման իրավունքը և ստեղծված պայմաններում իրականացնել համազգային մոբիլիզացիա՝ պաշտպանելու Արցախի և Հայաստանի Հանրապետության ինքնիշխանությունը։

Ուստի, Արցախի ժողովրդի ինքնորոշման իրավունքի ոտնահարումը ցանկացած պատրվակով հանդիսանում է հավաքական ազգային շահերի դավաճանություն և հանգեցնելու է տվյալ իշխանությունների հեռացմանը,- փաստում է «Համախմբում» շարժման խորհուրդը։

Լինա Արամյան