ՀայաՔվե նախաձեռնությունը հանձնառություն է ստանձնում՝ պայքարելու գործող վարչախմբի հերթական հակազգային ու հակապետական գործընթացի դեմ

•Փորձ է արվում օտարելու հայությանը իր ստեղծած պետությունից, զրկելու մշակութային ժառանգությունից, վերացնելու հայ մարդու հիշողությունը և արժանապատվությունը։

•Սահմանադրական բարեփոխումների կեղծ քողի տակ փորձ է արվում վերացնելու հայկական անկախ պետականությունը՝ այն վերածելով Թուրքիայից ու Ադրբեջանից բացահայտ կախման մեջ գտնվող կիսապետական ինչ-որ կազմավորման։

•Նոր սահմանադրության ընդունման նպատակը Հայաստանի անկախության հռչակագրի փաստացի չեղարկումն է, որով սահմանված են հայության հիմնական ազգային նպատակները՝ ազգային հզոր պետության կառուցում, Հայոց ցեղասպանության միջազգային ճանաչում և դատապարտում, Հայաստանի և Արցախի վերամիավորում։ Գործող վարչախմբի ներկայացուցիչներն իրենք են խոստովանել, որ այս ամենն արվում է Բաքվի և Անկարայի պարտադրանքով։

•Հայ մարդուն առաջարկվում է ընտրություն կատարել անպատվության ու պարտության միջև։

•ՀՀ Սահմանադրությունը հստակորեն սահմանում է հանրաքվեի իրականացման ընթացակարգը։ Նախ` դրա որոշումը պետք է ընդունի ԱԺ-ն, այն պետք է հաստատի Սահմանադրական դատարանը, իսկ հարցը հանրաքվեի դնելուց հետո գրանցված ընտրողների մեկ քառորդը պետք է քվեարկի։ Մեր պայքարն ուղղված է նրան, որ այս իշխանությունը չկարողանա նույնիսկ հաղթահարել այդ փուլերը և հանրաքվե նշանակել։

Կոչ ենք անում պետության ճակատագրով մտահոգ ուժերին ու կազմակերպություններին՝ միանալու մեզ։