«Fitch»-ը պատերազմ չի կանխատեսում

«Fitch» վարկանիշային գործակալությունն իր հերթական զեկույցում Հայաստանի և Ադրբեջանի միջև լայնամասշտաբ ռազմական էսկալացիա չի կանխատեսում։ Մինչ տարբեր վերլուծաբաններ, քաղաքագետներ, անգամ ՀՀ ԱԳՆ-ն էսկալացիա են կանխատեսում, հեղինակավոր տնտեսական գործակալությունն Ադրբեջանի տնտեսության վերաբերյալ իր կանխատեսումներում անդրադարձել է նաև Երևանի և Բաքվի միջև բանակցային գործընթացին՝ նշելով, որ Ադրբեջանը պնդում է փոփոխություններ կատարել Հայաստանի Սահմանադրության մեջ, ինչը կարող է քաղաքականապես բարդ որոշում լինել Հայաստանի կառավարության համար:

Ըստ Fitch-ի՝ համապարփակ խաղաղության համաձայնագիրը դժվար կլինի «Հայաստանից Ադրբեջանի պահանջների պատճառով՝ նրա տարածքով տարանցիկ միջանցք ստեղծելու և սահմանադրական փոփոխություններ կատարելու համար, ինչին քաղաքականապես դժվար կլինի համաձայնել»:

«Մեր բազային սցենարը հակամարտության սրում չի ներառում, թեև ադրբեջանական զորքերը շարունակում են ներկա մնալ Հայաստանի տարածքում և սպորադիկ փոխհրաձգություններ են տեղի ունենում»,-նշում է վարկանիշային գործակալությունը։

Fitch-ն իր կանխատեսման մեջ նշում է նաև Հայաստանի և Ռուսաստանի հարաբերությունների վատթարացումը։

«Ռուսաստանի հետ հարաբերությունները, կարծես թե, վատթարացել են. Հայաստանը դադարեցրել է մասնակցությունն ու բյուջետային վճարումները Ռուսաստանի գլխավորած Հավաքական անվտանգության պայմանագրի կազմակերպությանը, ինչպես նաև մասնակցում է զորավարժություններին ԱՄՆ-ի հետ»,- նշում է գործակալությունը՝ հավելելով, թե Ռուսաստանի հետ առևտրային կապերը մնում են ամուր, իսկ էներգետիկ անվտանգության հարցում Ռուսաստանից կախվածությունը շատ մեծ է:

Fitch-ը չի ակնկալում Հայաստանի դեմ ԱՄՆ-ի, Մեծ Բրիտանիայի կամ ԵՄ-ի երկրորդական պատժամիջոցները և ակնկալում է, որ Հայաստանի ֆինանսական հատվածը կպահպանի Ռուսաստանի դեմ պատժամիջոցները։

Աննա Մովսիսյան