ԶՊՄԿ-ի նոր նախագիծը Արծվանիկի պոչամբարում

Զանգեզուրի պղնձամոլիբդենային կոմբինատի Արծվանիկի պոչամբարում նախատեսվում է փոխել պատվարի բարձրացման և ամրաշինական աշխատանքների ներկայում կիրառվող մեթոդը։

Նոր մեթոդի կիրառման առաջարկը ներկայացրել են պատվարի լայնածավալ մոնիթորինգ իրականացրած միջազգային հեղինակավոր կազմակերպության մասնագետները։ Մինչ այժմ կիրառվող մեթոդը շուրջ 50 տարի օգտագործվել է և իրեն արդարացրել է, սակայն նոր մոտեցումը, ըստ մասնագետների, հնարավորություն կտա բարձրացնել պատվարի կայունությունն ու սեյսմակայունությունը և նվազեցնել հնարավոր ռիսկերը։

Պատվարի բարձրացման համար անհրաժեշտ քարագրունտային լցանյութը ներկայում վերցվում է պոչամբարի տարածքից։ Հետագայում նախատեսվում է լեռնային զանգվածը տեղափոխել Կապան քաղաքի վարչական տարածքից։ Արդյունքում Կապանի վարչական տարածքում կավելանան հարթ տարածքները, որոնք զարգացող քաղաքի պայմաններում պահանջված են։

Նոր մեթոդի կարևոր առանձնահատկություններից մեկն այն է, որ դրա կիրառման արդյունքում պոչանքն ավելի արագ կջրազրկվի։ Past.am-ի փոխանցմամբ՝ հավաքված ջուրը նախատեսվում է ուղղել գործող տեխնիկական պոմպակայան՝ այն հետագայում փոշենստեցման և կանաչապատ տարածքների ոռոգման նպատակներով օգտագործելու համար։

Այսպիսով, նախատեսվող փոփոխությունը միաժամանակ վերաբերում է պոչամբարի պատվարի կայունության և սեյսմակայունության բարձրացմանը, ինչպես նաև ջրային ռեսուրսների առավել արդյունավետ օգտագործմանը։