Հարսանեկան ամառ. Հենրիխ Մխիթարյանից բացի էլ ո՞վ է ամուսնացել

Հայաստանի հավաքականի ավագ Հենրիխ Մխիթարյանի հարսանիքը, անկասկած, քննարկվեց ու դեռ քննարկվելու է ոչ միայն Հայաստանում, այլև ամբողջ աշխարհում։ Բայց բացի Հենրիխից, այլ ֆուտբոլիստներ էլ են հասցրել հավերժ սիրո երդում տալ։ 433 կայքը, որն ավելի քան 21 մլն բաժանորդ ունի, կազմել է ֆուտբոլային աշխարհում մեծ աղմուկ հանած հարսանիքների ընտրանին։

Մեսութ Օզիլ
Լոնդոնի «Արսենալի» կիսապաշտպան, գերմանացի ֆուտբոլիստ Մեսութ Օզիլի և նրա ընտրյալի` թուրքական արմատներով շվեդ մոդել Ամինե Գյուլշեի հարսանեկան արարողությունը, որ կայացավ հունիսի 7-ին, բազմամարդ էր, բայց գլխավոր հյուրը Թուրքիայի նախագահ Ռեջեփ Թայիփ Էրդողանն էր։

Սերխիո Ռամոս
Հայտնի ֆուտբոլիստ, «Ռեալի» 33-ամյա պաշտպան Սերխիո Ռամոսը վերջապես ամուսնացավ իր սիրեցյալի` 41–ամյա հեռուստահաղորդավար Պիլար Ռուբիոյի հետ։ Հարսանեկան արարողությունը տեղի է ունեցել հունիսի 15-ին Սևիլյայի մայր տաճարում։ Զույգը երեք որդի ունի։

Հենրիխ Մխիթարյան
Հայաստանի ֆուտբոլի հավաքականի ավագ, Լոնդոնի «Արսենալի» կիսապաշտպան Հենրիխ Մխիթարյանը հունիսի 17-ի երեկոյան հարսանեկան լուսանկար հրապարակեց իր նորաթուխ կնոջ` Բեթի Վարդանյանի հետ։

Բեթին հայ գործարար Միքայել Վարդանյանի դուստրն է, իսկ հարսանեկան արարողությունը կայացել է հայկական մշակույթի համաշխարհային կենտրոններից մեկում` Սուրբ Ղազար կղզում։

Պետեր Շմեյխել
Դանիայի հավաքականի և «Մանչեսթեր Յունայթեդի» նախկին դարպասապահը հունիսի 15-ին երկրորդ անգամ ամուսնացավ։ Նրա ընտրյալը Լաուրա ֆոն Լինդհոլմն է։ Նորապսակները հանդիպել էին 2014-2017 թվականներին, բայց հետո բաժանվել։ Մի քանի ամիս առաջ նրանք որոշեցին ամուսնանալ։

Սեադ Կոլաշինաց
«Արսենալ» ակումբի ու Բոսնիա և Հերցեգովինայի հավաքականի պաշտպան Սեադ Կոլաշինացն օրերս ամուսնացավ իր վաղեմի սիրեցյալի` Բելայի հետ։ Զույգը շքեղ հարսանիք կազմակերպեց, որին ներկա էր նաև «Արսենալի» մեկ այլ խաղացող Մեսութ Օզիլը։

Դեյլի Բլինդ
Նիդեռլանդացի ֆուտբոլիստ, «Այաքս» ակումբի և Նիդեռլանդների հավաքականի խաղացող Դեյլի Բլինդը, ինչպես Մխիթարյանը, իր կյանքի կարևորագույն իրադարձությունը տոնեց երեկ` հունիսի 17-ին։ Ընտանեկան հավաքույթի լուսանկարը հրապարակել է հենց ֆուտբոլիստը։ Ի դեպ, նրա ընտրյալն արդեն հղի է, այնպես որ շատ շուտով նրանց ընտանիքը ևս մեկով կավելանա։

Պյոտր Զելինսկի
«Նապոլի» իտալական ակումբի և Լեհաստանի հավաքականի կիսապաշտպան Պյոտր Զելինսկին հունիսի 15-ին ամուսնացավ Լաուրայի հետ, որին առաջարկ էր արել դեռ 2017 թվականին։

Թեէմու Պուկկի
Երեկ նաև «Նորվիչ Սիթի» անգլիական ակումբի և Ֆինլանդիայի հավաքականի հարձակվող Թեէմու Պուկկիի հարսանիքն էր, որն անցկացվեց լողափում, իսկ տոնակատարությունը տեղի ունեցավ վրանում, ներկա էին մտերիմներն ու հարազատները։

Յագո Ասպաս
«Սելտա» ակումբի և Իսպանիայի ազգային հավաքականի հարձակվող Յագո Ասպասն ու մոդել Ջեննի Ռուեդան, թեև արդեն երկու երեխա ունեն, այդուհանդերձ որոշեցին հարսանիք կազմակերպել։ Նրանց խնջույքը կայացավ հունիսի 16-ին։