Վարդագույն, կարճ զգեստ, աֆրիկյան հյուսքեր. Ռիհաննան Նյու Յորքում ներկայացրել է հագուստի հավաքածուն

Ռիհաննան ճանապարհորդում է մեգապոլիսներում՝ ներկայացնելով իր Fenty ապրանքանիշի դեբյուտային հավաքածուն LVMH-ի աջակցությամբ։

Երգչուհին հայտնվել է Նյու Յորքում գտնվող The Webster մուլտիբրենդային խանութում, ուր ներկայացված է հագուստը։ Երգչուհին մետաքսյա, վառ վարդագույն զգեստ էր ընտրել, որը բաց է մեջքի հատվածում եւ խորը լանջաբացվածք ունի։

Վառ կերպարն ամբողջացնում էին նույն երանգի կոշիկները, կանաչ քարերով զարդարված խոշոր ականջօղերը, թեւնոցները, մատանիները եւ այլ զարդեր։ Գործարար կինը վառ գույնի շրթներկ էր ընտրել, իսկ աչքերն ընդգծել էր մուգ մոխրագույն ստվերաներկով։ Բացի այդ՝ Ռիռին ցուցադրել է նոր սանրվածքը՝ երկար աֆրիկյան հյուսքեր։

Ռիհաննան սեփական նորաձեւության տունը ստեղծել է Louis Vuitton Moet Hennessy ընկերությունների խմբի աջակցությամբ։ Բարբադոսյան արմատներով երգչուհին հագուստը ներկայացնելու ընթացքում շնորհակալություն է հայտնում բոլորին, ովքեր հավատացել են «կղզուց եկած փոքրիկ աղջկան»։