«Աղջկաս անունը 8 տարի առաջ էի որոշել»․ Սիլվա Հակոբյանի նոր ֆոտոշարքն ու ամուսնու արձագանքը դստեր անվան ընտրությանը

Երգչուհի Սիլվա Հակոբյանը շուտով մայրիկ կդառնա: Այս կարգավիճակին Սիլվան երկար է սպասել: Թեև երգչուհին լուրը չէր թաքցնում իր երկրպագուներից, նոր կարգավիճակի մասին խոսել զգուշանում էր: Ասում է՝ ուզում էր խոսել վերջում, երբ հղիության 3 եռամսյակն էլ անցած կլինի ու լիարժեք կզգա իր կարգավիճակի բերկրանքը:

Փոքրիկի ծննդին ընդառաջ Սիլվան ֆոտոշարք է անցել, որը տրամադրել է Tert.am Life-ին ու պատմել նոր կարգավիճակի մասին:

Սիլվան ու Նորայրը դուստր են ունենալու: Փոքրիկին տալու են Միլա անունը: Իր աղջկա անունը Սիլվան որոշել էր, երբ Նորոյի հետ հարաբերություններ էլ չուներ:) «8-9 տարի առաջ ինչ-ոչ տեղ կարդացի, որ երեխային Միլա անունն են տվել, տպավորվեց մեջս ու որոշեցի, որ երբ դուստր ունենամ, իրեն այդ անունն եմ տալու: Նորոյին շատ վաղուց էի ասել այդ մասին, դեռ ընկերություն էինք անում: Շատ ուրախացա, երբ ասաց՝ ես էլ եմ այդ անունը շատ սիրում, որովհետև նա շատ է սիրում Միլա Կունիսին»,- պատմեց ապագա մայրիկը:

Երգչուհու խոսքով՝ իրենց համար երեխայի սեռը նշանակություն չի ունեցել: «Փոքրիկը շատ սպասված է մեր ընտանիքում: Նա իմ ամենանվիրական երազանքն էր: Սեռի հարցում ոչ ես, ոչ էլ Նորոն նախապատվություն չունեինք: Միշտ ասում էինք, որ երեխան Աստծո պարգև է: Հղիությանս ընթացքում բոլորն ինձ ասում էին՝ նրբացել ես, տղա ես ունենալու, բայց ես հոգուս խորքում վստահ էի, որ աղջիկ է, որովհետև աղջիկն ինձ մոտ ասոցացվում է ուժեղ սեռի հետ, իսկ ես սկզբում մի շարք դժվարություններ հաղթահարեցի, ինքն այնքան փորձության միջով անցավ, բայց պինդ մնաց: Բացի այդ, մեր ընտանիքում բոլորի առաջնեկները աղջիկ են եղել: Վստահ էի, որ ես բացառություն չեմ լինելու»,- ոգևորությամբ պատմեց Սիլվան:

Բարդությունները, որոնց մասին խոսեց Սիլվան, պայմանավորված էին հղիության առաջին եռամսյակում վատառողջ լինելով և ծանրաբեռնված գրաֆիկով: «Հղիությանս մասին իմացա, երբ մեկնել էի շրջագայության Ռուսաստանի 18 քաղաքում: Երգչի համար բավականին ծանր են այդպիսի շրջագայությունները: Սկզբնական փուլում փոքր-ինչ վախեցած էի, քանի որ մինչև հղիությանս մասին իմանալս հասցրել էի հիվանդանալ, հակաբիոտիկներ էի խմել կոկորդս բուժելու համար: Բայց արի ու տես, որ Աստծո պարգև երեխային ոչինչ չի խանգարի: Նորոն ինձ հետ չէր, մայրիկս ու հայրիկս էին ինձ ուղեկղցում: Սկզբում չէի հավատում, մտածում էի՝ ինչպես կարող է լինել, բայց երբ համոզվեցի, որ իսկապես բալիկի եմ սպասում, որոշեցի ոչ ոքի չասել, բացի քույրիկիցս, քանի որ առջևում 3 համերգ ունեի, բավականին ծանրաբեռնված շրջան էր, չէի ուզում անհանգստանային»,- հուզմունքով հիշեց երգչուհին, որն իր հղիության մասին ծնողներին հայտնել է Հայաստանի ճանապարհին՝ հայրիկի տարեդարձի կեսգիշերին, ամուսնու համար որոշել էր անակնկալ պատրաստել, բայց չի ստացվել:

«Երբ ծնողներիս հայտնեցի լուրը, ճանապարհին էինք, հայրիկիս տարեդարձի գիշերն էի, կանգ էինք առել գազալցակայանում: Իրեն տուփ հանձնեցի, որի մեջ խորհրդանշական նվեր էի դրել: Երբ հասկացավ, որ կրկին պապիկ է դառնալու, բոլորս սկսեցինք ուրախությունից լացել: Այդպես շատ ուրախ տրամադրությամբ ժամանեցինք Հայաստան: Նորոն ու մեր հարազատները եկել էին մեզ դիմավորելու: Ես որոշել էի տանը գեղեցիկ անակնկալ պատրաստել և այդպես նրան հայտնել լուրը, սակայն ամեն բան հանկարծակի ստացվեց: Անկախ ինձնից ճանապարհին հայտնեցի, որ մենք բալիկ ենք լինելու: Այնպես ոգևորվեց, հուզվեց, քիչ էր մնում վթարի ենթարկվեինք»,- պատմեց երգչուհին:

Սիլվան ասաց, որ փոքրիկի մասին լուրն իմանալուց հետո իր զգացմունքային դաշտը լրիվ փոխվել էր, բայց մայրանալու փաստը լիարժեք ընկալել է միայն, երբ առաջին անգամ զգացել է երեխայի խաղը: «Չէի կարողանում հավատալ երջանկությանս, երբ առաջին անգամ այցելեցի բժշկի, հասկացա, որ իրականում իմ ներսում մարդուկ է ձևավորվում, բայց սկսեցի լիարժեք զգալ, որ մայրիկ եմ դառնալու, երբ առաջին անգամ զգացի երեխայի խաղը: Ամեն անգամ, գնում էի ուլտրաձայնային հետազոտության ու տեսնում իր շարժը, աճը, աչքերիցս արցունքներ էին հոսում»,- ասաց նա ու հավելեց, որ միշտ է հուզմունքային եղել, սակայն հղության ընթացքում դա կրկնապատկվել է: Սիլվան նկատեց, որ նույնիսկ իր ծիծաղն է փոխվել:

Հղի կանանց բնորոշ են կամակորություններ: Սիլվայի խոսքով՝ ինքն էլ ավելի պահանջկոտ է դարձել, իսկ ամուսինն ամեն բան անում է որպեսզի ինքը հանկարծ չսրտնեղի: «Երևի, Նորոն ավելի ճիշտ կբնորոշի՝ հիմա ինչպիսին եմ: Երևի, ավելի պահաջկոտ եմ, գուցե, կամակորություն էլ լինի: Նորոն լուռ տանում է իմ կամակորությունները՝ գիտակցելով, որ ինձ չի կարելի նյարդայնանալ: Նա միշտ ուշադիր է եղել, բայց հիմա շատ ավելի ուշադիր է դարձել, ավելի նրբանկատ: Որքան մոտենում են երեխայի ծննդյան օրերը, այնքան Նորոն ավելի անհամբեր, միաժամանակ, վախկոտ է դառնում՝ անհանգստության առումով»,- ասաց Սիլվան ու հավելեց, որ հղիությունը միայն ավելի ամուր է դարձրել իր նորաստեղծ ընտանիքը:

«Իմ ու Նորոյի հարաբերությունները միայն դեպի լավն են փոխվել: Փառք Աստծո, որևէ խնդիր չի եղել: Խաղաղ երջանիկ հղիոթյուն ունեմ,- ասաց նա ու ավելացրեց, որ ամբողջ օրվա ընթացքում խոսում է երեխայի հետ,- Նորոն ասում է՝ դու այդ հողի վրա լրիվ խելագարվել ես:) Ինքն էլ ճանաչում է ձայները, արձագանքում: Այս ընթացքում շատ երգեր եմ ձայնագրել: Հետաքրքիր է, որ կան երգեր որոնց արձագանք է տալիս՝ երգի առաջին նոտաներից մինչև վերջ պարում է, կան երգեր, որոնց ոչ մի կերպ չի արձագանքում, երևի չի հավանում: Այն երգերը, որոնց արձագանքում է, հաջողություն են ունենում: Այդպիսին էր Արաքսյա Վարդերսյանի երգի cover-ը, որի մասին միայն դրական կարծիքներ եմ լսել»:

Սիլվան նաև պատկերացնում է, թե ինչպիսին է լինելու դուստրը․ «Ամբողջ օրը պատկերացնում եմ, թե ինչպիսին է լինելու: Իրեն պատերացնում եմ շատ սպիտականաշկ, շեկ մազերով, կապուտաչյա, համովիկ, սիրուն աղջիկ: Իմ կարծիքով՝ պապայի գեներն ուժեղ կլինեն: Իհարկե, կարող է և սխալվեմ, ինչպիսին էլ լինի, իրեն շատ եմ սիրելու»:

Ապագա մայրիկը, որն անհամբերությամդ սպասում է դստեր ծննդին, անկեղծացավ, որ փոքրիկ մտավախություններ էլ ունի, բայց վստահ է՝ իրեն մենակ չեն թողնի․ «Կապ չունի՝ որքանով ես պահել զարմիկներիդ, երբ ինքդ ես պատրաստվում մայրանալ, վախենում ես ինչ-որ բան չկարողանալ: Միաժամանակ, մտածում եմ, որ գլուխ կհանեմ փոքրիկի խնամքից, բացի այդ, ինձ մենակ չեն թողնի: Ե՛վ մայրիկս, և՛ սկեսուրս, և՛ քույրս պատրաստակամ են օգնել ինձ: Չեմ կարծում, ինչ-որ բան դժվար լինի ինձ համար: Երևի, մի քիչ համարձակության պակաս ունեմ, որը ժամանակի հետ ձեռք կբերեմ»,- ասաց երգչուհին:

Սիլվան արդեն հասցրել է լիարժեք պատրաստվել փոքրիկի ծննդին: Այս փուլում նրա համար ամենահաճելի զբաղմունքը երեխայի համար ինչ-որ բան անելն է: Աղջնակը նաև շատ նվերներ է ստացել․ «Շատ դեպքերում ինձ հերթ չի հասել գնումներ անելու, բայց ես էլ ոգևորությամբ մանկական իրեր եմ ձեռք բերում: Հաճախ ասում են՝ ինչո՞ւ ես շտապում, բայց ես ոգևորությամբ եմ անում ցանկացած բան, որ կապված է երեխայիս հետ: Դա լրիվ այլ աշխարհ է, որն ինձ մեծ էներգիա է տալիս»:

Երգչուհին հիմա շատ երջանիկ է: Ասում է՝ իր կյանքը համապատասխանում է իր երազանքներին․ «Երջանիկ եմ, բայց վստահ եմ, երբ նա ծնվի ամեն բան ավելի լիարժեք կլինի: Որքան էլ ամուսնանում ես քո սիրած մարդու հետ, երջանիկ ես, միևնույն է, երբ երեխա չունեք, մի տեսակ դատարկություն է լինում: Երեխայի ծննդից հետո ամեն բան փոխվում է, նա բերում է այն, ինչ նախկինում պակասել է զույգերին: Դրա համար ցանկանում եմ, որ զույգերը, որոնք չեն կարողանում երեխա ունենալ, կամ չեն ուզում, անպայման ունենան: Դա իսկապես հրաշք է»,- ասաց նա: