«Որքան էլ Մաքսի հետ կապված լինեմ՝ ես ուրախ եմ, որ «Էլենի օրագիրը» ճիշտ ժամանակին ունեցավ իր տրամաբանական ավարտը»․ Էդգար Իգիթյանը՝ բացասական կերպար մարմնավորելու և Մաքսի դերը հետևում թողնելու մասին

Դերասան Էդգար Իգիթյանը, որը «Էլենի օրագիրը» նախագծի գլխավոր հերոսներից էր, ներկայումս պատրաստվում է հեռուստադիտողներին ներկայանալ նորովի՝  «Շանթ» հեռուստաընկերության «Երկուսով» նոր՝ սպասվող հեռուստասերիալի շրջանակներում։ 

Tert.am Life-ը դերասանի հետ զրուցել է իրեն լայն ճանաչում բերած Մաքսի կերպարից, նրան հետևում թողնելուց և արդեն նորովի ներկայանալուց։

«Մաքսի կերպարի հետ մեր կապվածությունը միանշանակ դեռ կա։ «Էլենի օրագիրը» ինձ, որպես դերասան, իսկապես շատ բան է տվել։ Չնայած իմ մուտքը հեռուստատեսություն եղել «Սահմանին» նախագծով, սակայն Մաքսի կերպարի դեպքում շեշտը դրված էր խոսքի վրա և այստեղ խաղարկային շատ բաներ կային։ Որքան էլ Մաքսի հետ կապված լինեմ՝ ես ուրախ եմ, որ  նախագիծը ճիշտ ժամանակին ունեցավ իր տրամաբանական ավարտը։ Եթե որևէ նախագիծ երկարում է այն քիչ թե շատ կորցնում է այն ոգևորությունը, որն ի սկզբանե եղել է։ Մեր դեպքում նման բան իհարկե տեղի չունեցավ»,- ասաց դերասանը։

Էդգարի խոսքով՝ իր արդեն հայտնի կերպարից բաժանմանը նայել է սթափ ու հանգիստ․ «Ամեն ինչ պետք է ունենա ինչպես սկիզբ, այնպես էլ՝ ավարտ։ Ներկայումս արդեն ուրիշ կերպարի վրա եմ աշխատում և փորձում եմ հետաքրքրությունը գտնել դրա մեջ։ Ինքս ուզում էի մարմնավորել կերպար, որը կկարողանայի ուրիշ կերպ մատուցել, այլ կերպ ներկայացնել»։  

Հեռուստադիտողները դերասանին նոր նախագծում կտեսնեն բացասական գծերով, սակայն, վստահեցրեց Էդգարը, որոշ գծեր հեռուստադիտողներին, ամեն դեպքում, դուր են գալու․ «Պետք է կերպարիս լավ ճանաչեմ, կարողանամ գտնել իր պատմությունը, ստեղծեմ իմը, որ կարողանամ կերտել այնպես, ինչպես ես եմ ուզում։ «Երկուսով» նախագծի նկարահանումները դեռ նոր են սկսվել՝ հետևաբար դեռ սկզբնական փուլում է, երբ ինքս էլ փորձում եմ պատկերացնել, թե ինչ է ստացվելու։ Մարմնավորում եմ բացասական կերպարի․ սկզբում նա վատն է, թե հետո ինչ զարգացումներ կլինեն՝ չեմ կարող ասել։  Ժպիտը, հումորները, որոշ մտքեր՝ հեռուստադիտողները կսիրեն, բայց ընդհանուր իր տեսակը վատն է»։

Խոսելով իր նախորդ՝ Մաքսի կերպարի հետ ունեցած տարբերություններից՝ Էդգարն ասաց․ «Մաքսի հետ, իհարկե, բավականին տարբերություններ ունի՝ այս կերպարս ավելի հասուն է տարիքային առումով, ավելի վառ, ընգծված բնավորությամբ է, ազդեցիկ է և հետաքրքրականն այն, որ այս կերպարս իր մեջ ունի գծեր, որոնք հեռուստադիտողներին դուր կգան և միաժամանակ կան այնպիսի գծեր, որոնք դուր չեն գա։ Նա մի կերպար է, որն իր կյանքում դժվարություններ չի տեսել, իրեն միշտ ամեն ինչ հասանելի է եղել»։  

Էդգարի խոսքով՝  մի նախագծից մյուսին անցլնելու ընթացքում դադար չի ունեցել, ինչն էլ իր համար, որպես դերասան, որոշ դժվարություններ է առաջացրել․ «Կար մի գիծ, որն իհարկե պետք է հաղթահարեի, քանի որ ինքս երկու տարի կերտել եմ նույն կերպարը, գուցե անգամ նմանվել նրան և առանց ընդմիջում վերցնելու՝ անցում եմ կատարել մեկ այլ կերպարի։ Սա որոշ դժվարություն իրենից ներկայացնում է, բայց նաև շատ հետաքրքիր է։ Այսինքն ինձ պետք էր, որ ինքս էլ հասկանամ՝  պատրաստ եմ կենտրոնանալու Ալենի կերպարը կերտելու վրա»։

Դերասանը, որին հեռուստադիտողներն արդեն հասցրել են ընդունել դրական և սիրելի կերպարով, շուտով էկրանին է լինելու բացասական բնավորությամբ։ Սակայն Էդգարը նշեց՝ սիրում է իր կերպարներին անկախ նրանց բնավորության գծերի․ «Իրականում, եթե անգամ բացասական կերպար ես մարմնավորում և չես սիրում՝ շատ դժվար կլինի այն մարմնավորելը։ Քանի որ եթե ինքդ չես ընդունում քո կերպարին, ապա չես կարող նրան ցույց տալ, հասցնել հեռուստադիտողներին։ Ես փորձում եմ սիրել կերպարներս, հետաքրքրություններ գտնել նրանց մեջ։ Օրինակ իմ նոր կերպարի հետ կապված արդեն մշակած ժեստեր ունեմ, որոնք համարել եմ, որ կարող է բնորոշել նրան՝ անընդհատ կրկնում եմ, աշխատում եմ դրանց վրա՝ մինչև դրանք դառնան հիմնական։ Այնքան պետք է դրանք եփվեն, որ հետագայում դառնան սովորություն։ Էլի մտածված բաներ կան, որոնք ընթացքում դեռ կանեմ»։

Պարզվում է Էդգարը, բայցի ժամանակակից դերերից, ունի նաև մասնագիտական մեկ այլ ցանկություն․ «Ինքս պատմական ֆիլմերի սիրահար եմ, շատ եմ դիտում նման ժանրի ֆիլմեր։ Հետագայում մեծ է ցանկությունս մարմնավորելու մի կերպար, որը կլինի պատմական հերոս։ Պատմություն, հին ժամանակներ՝ նման ֆիլմերում կցանկանամ հանդես գալ»։