Ի՞նչ է լինելու, եթե աշակերտը հրաժարվի դիմակ կրել, լինելու է արդյո՞ք որևէ պատժի միջոց. Պարզաբանում է փոխնախարարը

Ինչ է լինելու, եթե աշակերտը հրաժարվի դիմակ կրել, լինելու է արդյո՞ք որևէ պատժի միջոց:

Այսօր ուսումնական պրոցեսի վերաբերյալ քննարկման ժամանակ ԿԳՄՍ փոխնախարար Ժաննա Անդրեասյանը հիշեցրեց, որ դիմակների կրման պահանջն այսօր էլ է գործում. «Իհարկե պարետի որոշմամբ առանձնացված է մարդկանց խումբ, ում հնարավորություն է տրվում դիմակ չկրել բժշկի ցուցմամբ: Ընդհանուր կանոններ կան, իսկ դպրոցներում որևէ հավելյալ կարգավորում չի լինելու: Գործընթացը կազմակերպվելու է այնպես, ինչպես ցանկացած այլ վայրում»:

Վերահսկողության գործընթացը տրված է տեսչական մարմնին, որը կհետևի, թե որքանով է գործընթացը պահպանվում. «Առաջին փուլում այցելությունները լինելու են աջակցող բնույթ, խնդիր չկա որևէ մեկին տուգանելու, պատժելու, եթե խոսքը չի վերաբերում պաշտոնական անձի անգործությանը, անփութությանը:

Մենք հասկանում ենք, որ գործ ունենք երեխաների հետ: Մենք պետք է հենց երեխաներին բացատրենք կանոնների պահպանման կարևորությունը, թե ինչպիսի հետևանքներ կլինեն, եթե դրանք չպահպանվեն:

Եթե մենք գտնենք բացատրության ձևը, մեր երեխաներին սովորեցնենք առողջ ապրելակերպի, հանրային ճիշտ վարքագծի կանոնները, ու նրանք կարողանան դրանք կիրառել, արդյունքում ավելի արդյունավետ պայքար կլինի կորոնավիրուսի դեմ, իսկ վաղն ավելի գիտակից քաղաքացի կունենանք, ովքեր գուցե նաև կանխեն իրավիճակները, որոնց մեջ մենք այսօր ենք հայտնվում հանրային ոչ բավարար պատասխանատու վարքագծի հետևանքով»: