«Շատ թանկ զգեստներ կան, որոնք իմ ճաշակով չեն». Իրինա Այվազյանի ամենաթանկ ու ամենաէժան գնումները

Հայտնի մարդկանց ոճն ու սիրելի իրերը ներկայացնող շարքի շրջանակում Tert.am Life-ը ներկայացնում է դերասանուհի Իրինա Այվազյանին:

Իրինայի խոսքով` առօրյայում կրում է հիմնականում սպորտային կոշիկներ ու լայն հագուստ:

«Իմ զգեստապահարանում գերակշռում են հուդիներն ու սպորտային կոշիկները: Մայրս անգամ բարկանում է, երբ նորն եմ գնում: Բարձրակրկունկներ նույնպես կրում եմ, բայց սպորտային կոշիկներն ավելի շատ եմ սիրում: Երկու տարի առաջ «Reebok»-ից սպորտային կոշիկ ունեի, որն այնքան կրեցի, մինչև մաշվեց: Ունեմ նաև մանուշակագույն հուդի, որը գնել եմ «Bershka» խանութից: Սկզբում այն արժեր մոտ 17 հազար դրամ, բայց ես ափսոսում էի այդքան գումար վճարել հուդիի համար: Սպասեցի, մինչև դարձավ 6900 դրամ ու գնեցի: Երկու օր հետո դարձավ 4900 դրամ, ես էլ զղջացի, որ ավելի թանկ եմ գնել»,-ասաց նա:

Իրինայի խոսքով` սիրում է խանութներ գնալ, օնլայն գնումներ չի սիրում, որովհետև սպասել չի սիրում: «Խանութների դեպքում էլ հեշտ եմ ընտրություն կատարում: Հիմնականում Հայաստանից եմ ձեռք բերում հագուստներս, բայց երբ արտերկիր եմ մեկնում, այնտեղից ևս գնումներ անում եմ»,-նշեց նա:

Խոսելով երեկոյան զգեստների մասին` Իրինան ասաց. «Ունեմ սև զգեստ, որը ձեռք եմ բերել «Kotton» խանութից` 39 հազար դրամով: Նաև տոնական կարմիր զգեստ ունեմ, որը հայկական արտադրության է, գնել էի հարսանիք գնալու համար, բայց գինը չեմ հիշում»:

Անդրադառնալով իր ամենաթանկ ու ամենաէժան գնումներին` դերասանուհին ընդգծեց, որ եթե իրեն ինչ-որ հագուստ շատ է դուր գալիս, կարող է գնել նաև թանկ գնով, բայց եթե նույնից կարող է նաև ավելի մատչելի տարբերակով ձեռք բերել, թանկը չի գնի:

«Ինձ համար գինն էական չէ: Շատ թանկ զգեստներ կան, որոնք իմ ճաշակով չեն: Կարծում եմ` ամեն ինչ կախված է համադրելուց: Կարող եմ 1000 դրամանոց բլուզը համադրել ինչ-որ կիսաշրջազգեստի հետ ու գեղեցիկ ստացվի: Պարտադիր չէ, որ զգեստն արժենա 100 հազար դրամ, նոր գեղեցիկ համարվի: Իմ գնած ամենաթանկ իրը երկարաճիթ աշնանային կոշիկներն են եղել, որոնք ձեռք եմ բերել 50 հազար դրամով, իսկ ամենաէժան գնումս բլուզ է եղել, որը գնել եմ 500 դրամով: Ընկերուհիս ասել էր, որ կա մի տեղ, որտեղ նման բլուզ են վաճառում, երկուսով գնեցինք»,-նշեց նա:

Իրինան նաև ասաց, որ մինիմալիստական ոճի սիրահար է, աքսեսուարներ հաճախ չի կրում: «Ունեմ ականջօղ, որը միշտ կրում եմ: Մատանիներ ևս սիրում եմ, բայց չեմ կրում ամեն օր: Նաև ակնոցների մեծ հավաքածու ունեմ, որոնք, կրկին, ամեն օր չեմ կրում: Գլխարկների սիրահար եմ, որոնց մի մասը գնել եմ, իսկ սև գլխարկս ընկերներիցս մեկինն էր, իրենից եմ վերցրել»:

Շարունակությունը՝ ՀՂՈՒՄՈՎ