Քանի՞ հայ գերի կա այս պահին Ադրբեջանում․ ազատության մեջ գտնվող կանայք ու տղամարդիկ անմարդկային տանջանքների մասին են պատմել, 2 մարդ սպանվել է բանտում

Մինչև 44 ռազմագերու վերադարձը մի քանի անգամ այլ գերիներ ևս վերադարձվել են: Այս մասին մամուլի ասուլիսի ժամանակ հայտարարեց Արցախի ՄԻՊ Արտակ Բեգլարյանը:

Խոսքը վերաբերում է ինչպես ֆիզիկական, այնպես էլ հոգեբանական բռնությանը:

Բեգլարյանը հայտնեց, որ գերիների մի զգալի մասը մինչև այս պահը կրում են բռնության հետևանքները. «Քանի որ ճնշող մեծամասնությունը Երևանում են, հիվանդանոցներում, մեր աշխատակազմը դեռևս նրանց հետ հանդիպումներ չի ունեցել: Բայց ՀՀ ՄԻՊ-ի հետ համագործակցում ենք:

Նրանց մի մասի հետ արդեն հայնդիպել են: Աշխատում ենք նաև այլ մարմինների հետ:

Չեմ կարող հստակ թիվ ասել, սակայն եթե ոչ բոլորը, ապա ճնշող մեծամասնությունը ենթարկվել են ֆիզիկական բռնության»:

Ըստ Բեգլարյանի, մեկ կին հոկտեմբերին է վերադարձվել, իսկ արդեն դեկտեմբերի սկզբներին 3 անգամ այլ գերիներ են վերադարձվել, հիմնականում՝ քաղաքացիական անձինք. «Ընդհանուր թիվն, իմ տեղեկություններով 53 է»,-ասաց Բեգլարյանը՝ հավելելով, որ երկու քաղաքացիական պաշտոնապես հայտարարված գերիներ մահացել են ադրբեջանական բանտում:

Մեկի մարմինը փոխանցվել է, մյուսինը դեռ ոչ: Երկուսի պարագայում էլ ապացույցներ կան պնդելու, որ բանտում սպանվել են: Երկուսն էլ մոտ 80 տարեկան են»:

Բեգլարյանը հավելեց, որ այս պահին 40 անհետ կորած քաղաքացիական անձ կա, որոնց մի մասը տարբեր տեղեկություններով, սպանվել են. «Մի մասով հստակ ապացույցներ ունենք, որ գերեվարված են, ադրբեջանական բանտում են գտնվում»: