Արցախյան պատերազմում քանի զոհ, վիրավոր ու անհետ կորած ունենք յուրաքանչյուր մարզում. Հարցումն ուղարկվել է բոլոր մարզերին

Հունվարի 21-ին Ազգային ժողովում Տիգրան Ավինյանը հայտարարեց, որ այս պահի դրությամբ (հայտարարությունն արված պահին) մենք ունենք դուրս բերված 3439 մարմին, որոնցից դեռևս նույնականացված չեն 766-ը: Խոսելով զոհերի թվի մասին՝ Ավինյանը հստակ թիվ չասաց, սակայն նշեց, որ այն չի անցնելու 4000-ը:

Մինչ այդ ոչ մեկ անգամ է հայտնվել (ոչ պաշտոնական), որ մեր զոհերի թիվն անցնում է 5 հազարը: Պատերազմի ավարտից արդեն անցել է ավելի քան 2 ամիս, սակայն Պաշտպանության նախարարությունը, մյուս պատկան մարմինները դեռ չեն հայտնել, թե քանի զոհ, վիրավոր, անհետ կորած, գերի ունի հայկական կողմը:

Analitik.am-ը հարցում է ուղարկել ՀՀ բոլոր մարզեր՝ փորձելու համար գոնե այդկերպ պարզել, թե որ մարզում քանի զոհ կա, վիրավոր, անհետ կորած կա, ինչը թույլ կտար իրականին մոտ թվեր ստանալ:

Հարցումն ուղարկվել է հունվարի 6-ին, մենք պատասխան չենք ստացել միայն Արմավիրի ու Կոտայքի մարզերից: Այս երկու մարզերից անգամ չի ասվել, որ ժամանակ է պետք պատասխանելու համար: Ստորև ներկայացնում ենք մյուս մարզերից ստացած պատասխանները:

Սյունիքի մարզ

ՀՀ Սյունիքի մարզպետարանում Ադրբեջանի կողմից 2020 թվականի սեպտեմբերի 27-ին Արցախում սանձազերծված պատերազմի հետևանքով զոհերի, անհետ կորածների և վիրավորների մասին հստակ տեղեկություններ չկան: Մարզպետարանում, համայնքների ստացված տեղեկատվության հիման վրա, վարվում է միայն Սյունիք մարզում հաշվառված և հուղարկավորված զինծառայողների վերաբերյալ տվյալների շտեմարանը: Մարզում 2021 թվականի հունվարի 8-ի դրությամբ հուղարկավորվել է 175 զինծառայող:

Ձեր կողմից հայցվող տեղեկությունների համար առաջարկում ենք դիմել ՀՀ ՊՆ:

Արագածոտնի մարզ

Տեղեկացնում ենք, որ ՀՀ Արագածոտնի մարզպետարանն իրավասու չէ Արցախյան պատերազմի արդյունքում զոհված, վիրավոր ու անհետ կորած զինվորների վերաբերյալ պաշտոնական տեղեկատվություն տրամադրելու:

Արարատի մարզ

Հայտնում ենք Ձեզ, որ Արցախյան երկրորդ պատերազմի արդյունքում զոհված, վիրավորված, անհետ կորած անձանց վերաբերյալ տվյալները հրապարակման ենթակա չեն:

Գեղարքունիքի մարզ

Ձեր հարցումը քննարկվել է մարզպետարանի համապատասխան ստորաբաժանումներում, պատասխանը հետևյալն է. «Լիարժեք ու ամբողջական տեղեկատվություն ստանալու համար առաջարկում ենք դիմել ՀՀ ՊՆ ու Առողջապահության նախարարություն»:

Լոռու մարզ

Հայտնում ենք, որ նման տեղեկատվության մարզպետարանը չի տիրապետում: ՀՀ ՊՆ կողմից ստեղծվել է ԼՂ հակամարտության ընթացքում զոհված, անհայտ կորած և գերեվարված զինծառայողների, ինչպես նաև այլ անձանց վերաբերյալ տեղեկատվության հավաքման ու մշակման հատուկ հանձնաժողով (կոնտակտային տվյալներ ք. Երևան, Ուլնեցու 56/5, Թեժ գծի հեռախոսահամար՝ 81-35): Հանձնաժողովը միակ լիազոր մարմինն է, ով տիրապետում է նման տվյալների:

Շիրակի մարզ

Հայտնում ենք, որ խնդրո առարկա հարցերի վերաբերյալ ՀՀ Շիրակի մարզպետարանում արձանագրված տեղեկությունների տրամադրումը կարող է անուղղակիորեն խախտել ՀՀ պաշտպանության նախարարի 2015 թվականի հուլիսի 9-ի N 9-Ն հրամանի 1-ին կետով հաստատված ցանկի 42-րդ կետի պահանջները: Առաջարկում ենք համապատասխան տեղեկություններ ստանալու համար դիմել ՀՀ պաշտպանության նախարարություն:

Վայոց ձորի մարզ

Հայտնում ենք, որ Արցախյան պատերազմի արդյունքում, ինչպես նաև դրանից հետո Վայոց ձորի մարզի բնակիչների շրջանում գրանցված զոհերի, վիրավորների և անհետ կորածների վերաբերյալ պահանջվող տեղեկատվության համար, կարծում ենք, նպատակահարմար է դիմել ՀՀ ՊՆ կամ Աշխատանքի և սոցիալական հարցերի նախարարություններին՝ ավելի ամբողջական և հանգամանալից տեղեկատվություն ստանալու նպատակով:

Տավուշի մարզ

Առաջարկում ենք համապատասխան տեղեկատվություն ստանալու նպատակով դիմել համապատասխան պետական լիազոր մարմնին:

Երևանի քաղաքապետարանից ևս հայտնել են, որ պետք է դիմել ՊՆ-ին:

Ավելին՝ այստեղ