30-ից ավելի մեքենաներ իրար են բախվել. Շղթայական ավտովթար Հայաստանում

iPress.am-Այսօր՝ մարտի 16-ին, խոշոր ու շղթայական ավտովթար է տեղի ունեցել Կոտայքի մարզում։  Ժամը 11։50-ի սահմաններում Երևան-Սևան ավտոճանապարհի 26-րդ կմ-ում՝ Չայնիի ոլորանների մոտ 2 կմ-անոց հատվածում, բախվել են 30-ից ավելի ավտոմեքենաներ։  Ինչպես դեպքի վայրից հայտնում է ֆոտոլրագրող Գագիկ Շամշյանը, ըստ նախնական տեղեկությունների, վթարների հետևանքով, բարեբախտաբար, տուժածներ չկան։

Օպերատիվորեն ժամանել են Արտակարգ իրավիճակների նախարարության փրկարար ծառայության Կոտայքի մարզային փրկարարական վարչության հրշեջ փրկարարական ջոկատից 2 մարտական հաշվարկ։

Օպերատիվորեն ժամանել են նաև Ճանապարհային ոստիկանության 2-րդ սպայական գումարտակի 3-րդ վաշտի 1-ին դասակի ծառայողները՝ վաշտի հրամանատար Արթուր Պետրոսյանի, դասակի հրամանատար Տիգրան Քոթանջյանի գլխավորությամբ։ Տեղում աշխատում են նաև նույն վաշտի ավագ հետաքննիչներ Միշա Ստեփանյանը, Կառլեն Բաղյանն ու Ավետիք Ավետիսյանը։

Վթարի վայր է ժամանել նաև ՃՈ 2-րդ սպայական գումարտակի հրամանատարի տեղակալ Հայկ Դավթյանը։ Ոստիկանությունը պարզում է վարորդների ինքնությունը։ Դեպքի վայր են ժամանել նաև Աբովյանի հիվանդանոցի բժիշկների հերթապահ խումբը, ովքեր տեղում օգնություն են ցուցաբերել մի քանի վարորդների, սակայն բոլորը հրաժարվել են հիվանդանոց գնալուց՝ հայտնելով, որ իրենց լավ են զգում։ Ֆոտոլրագրողը հայտնում է, որ ճանապարհը եղել է անցանելի. Ճանշինը կատարել է ճանապարհի մշակման աշխատանքներ։ Վթարների պատճառը մառախուղն է։ Վթարի հետևանքով խցանումն անցնում է 3-4 կիլոմետրը։

Ավելին՝ այստեղ