Ինքնիշխան, հզոր, ուժեղ, բարեկեցիկ պետություն ունենալու հայ ժողովրդի կամքն այսօր ուժեղ է, քան երբևէ․ Արման Վարդանյան

«Միասնություն» շարժման ղեկավար Արման Վարդանյանն իր ֆեյսբուքյան էջում գրել է․ 

 

«Այսօր` ապրիլի 24-ին, մենք ոգեկոչում ենք Հայոց ցեղասպանության միլիոն ու կես նահատակների հիշատակը և խոնարհվում նրանց անմար հիշատակի առջև։ Ցավոք, 106 տարի անց Թուրքիան ոչ միայն հրաժարվում է ճանաչել Հայոց ցեղասպանությունը, այլև շարունակում է հայ ժողովրդի նկատմամբ իր ցեղասպան քաղաքականությունը:

Հայոց ցեղասպանությունը ժամանակին չդատապարտելն էր նաև պատճառը, որ հանգեցրեց Արցախի դեմ 2020 թվականի սեպտեմբերի 27-ին սանձազերծված պատերազմին, որի հետևանքով` նահատակվեցին հազարավոր հայորդիներ:

Եվ այսօր էլ, միջազգային հանրության լուռ համաձայնությամբ, Թուրքիայում և Ադրբեջանում վերածնունդ է ապրում հայատյացությունը: Այսօր էլ թուրքը սպառնում է հային, վիրավորում հայի արժանապատվությունը, անթաքույց տարածքային նկրտումներ դրսևորում Հայաստանի հանդեպ:

 

Ինքնիշխան, հզոր, ուժեղ, բարեկեցիկ պետություն ունենալու հայ ժողովրդի կամքն այսօր ուժեղ է, քան երբևէ:

 

Հետևաբար, սա խթան պետք է լինի՝ հզոր պետություն ունենալու, որի հիմքը տեխնիկապես ուժեղ բանակի կառուցումն է:

 

Աշխարհասփյուռ հայությանը միասնականության կոչ եմ անում, քանզի միայն այդ կերպ կարող ենք հաղթահարել Մեծ Եղեռնի և արցախյան վերջին պատերազմի ցավը: Մենք պարտավոր ենք լինել մեկ բռունցք՝ թույլ չտալով, որպեսզի կրկնվի պատմությունը։

Ոտքի՛, հայե՛ր, մենք պետք է միասնաբար կառուցենք հզոր պետություն, ամուր բանակ և զարգացած տնտեսություն»: