Տրինիդադ եւ Տոբագոյի ափերին հայտնաբերվել է ուրվական նավ 15 դիերով

Տրինիդադ եւ Տոբագոյի ափերին հայտնաբերվել է ձկնորսանավ, որտեղ  տասնհինգ տղամարդու դի կար, գրում է տեղի Daily Express պարբերականը։

Հրապարակման համաձայն՝ փետրվարի կեսին Գայանայի իշխանությունները այդ երկրի տարածքային ջրերում հայտնաբերել են 20-25 ֆուտ երկարությամբ նավ, առանց շարժիչի, նավի վրա՝ 5-10 տղամարդու մարմին։ Սակայն, երբ ռեսուրսները մոբիլիզացվել են եւ ուղարկվել նավը ափ հանելու համար, այն արդեն չի հաջողվել հայտնաբերել։ Գայանայի Հանրային աշխատանքների նախարարությունը հայտարարել է, որ հաշվի առնելով նավի գտնվելու վերջին վայրն ու հոսանքի ուղղությունը՝ նավն ուղղվել է դեպի Տրինիդադ եւ Տոբագոյի տարածքային ջրեր, հավանական է նաեւ, որ նավը կարող էր եւ խորտակված լինել։

Նախօրեին նման պարամետրերով նավ հայտնաբերվել է Տոբագոյի ատլանտյան ափին։ Նավի վրա իշխանությունները հայտնաբերել են 14 տղամարդու դի, ինչպես նաեւ 15-րդի գանգն ու ոսկրերը։ Դիերի հագուստը մարզական էր, նրանք անձրեւանոցներով էին։ Ելնելով դրեյֆի սխեմայից՝ նավը կարող էր ուղին սկսած լինել բաց Ատլանտյան օվկիանոսից եւ անգամ Աֆրիկայից։

Ընթացիկ տարվա մարտին Նիկարագուայի Կարիբյան ափի մոտ նույնպես հայտնաբերվել էր ձկնորսանավ՝ վեց փտող դիակներով։ Նիկարագուայի ներքին գործերի նախարարությունը հայտարարել է, որ դիերից մեկի մոտ եղել է Գվինեայի Հանրապետության անձնագիր, որը պատկանում էր 31-ամյա տղամարդու, եւ որ բոլոր զոհերը, գուցե, մահացել են ջրազրկումից եւ ջերմային հարվածից։

Ինչպես նշում է պարբերականը, Աֆրիկայի արեւմտյան ափի միգրանտները հաճախ են վտանգավոր ճանապարհորդություններ կատարում խախուտ նավակներով՝ փորձելով հայտնվել Եվրոպայում, ընդ որում՝ որոշ նավեր խորտակվում են, իսկ մյուսները դրեյֆում են բաց Ատլանտիկայում։