Ինչ իրավիճակ է Գեղարքունիքում. սահմանային իրավիճակը այս պահի դրությամբ

Րոպեներ առաջ ՊՆ-ն հայտարարություն տարածեց, որ դեկտեմբերի 10-ին, ժամը 12։00-ի սահմաններում, Ադրբեջանի ԶՈՒ ստորաբաժանումները հարձակում են գործել հայ-ադրբեջանական սահմանի արևելյան ուղղությամբ տեղակայված հայկական մարտական դիրքերի վրա։ Հայկական կողմի պատասխան գործողությունների արդյունքում հակառակորդը, կրելով մարդկային կորուստներ, հետ է շպրտվել ելման դիրքեր։ Այս պահին փոխհրաձգությունը շարունակվում է։
ՀՀ պաշտպանության նախարարությունը պարբերաբար հանդես կգա իրադրության վերաբերյալ հաղորդագրություններով։

ArmDaily.am-ը կապ հաստատեց Վարդենիսի ավագանու անդամ Վարդան Մարգարյանի հետ՝ պարզելու, թե ինչ է կատարվում այժմ Գեղարքունիքի մարզում։

«Գիտե՞ք ոնց են կրակում, մեր տղերքի հերթափոխի պահն է, հացի մեքենան պիտի գնա հերթափոխի, չեն թողնում, կրակի տակ են պահում»,-ArmDaily.am-ի հետ զրույցում ասաց Մարգարյանը։ 

Հարցին՝ թե պատասխան կրակ արձակվում է, թե ոչ, պատասխանեց՝ «Դա հստակ չեմ կարող ասել, բայց ոնց որ թե չի լսվում»։

Համացանցում նաև լուրեր են տարածվում 2 զոհերի և 5 վիրավորի մասին։ ArmDaily.am-ը կապ հաստատեց Գեղամասարի համայնքի ղեկավար Հակոբ Ավետյանի հետ՝ պարզելու լուրի իսկությունը։

«Ես էլ եմ լսել, բայց հստակ տեղեկություն չունեմ, չեմ ուզում կիսատ բաներ ասեմ, ճշտեմ կասեմ»,-ասաց նա։

Ավետյանի խոսքով՝ փոխհրաձգությունը շարունակվում է, սահմանային վիճակն էլ շարունակվում է լարված մնալ։

Սեդա Մակարյան