2021-ին Հայաստանից մեկնողները 73 հազարով ավելի են եղել Հայաստան ժամանողներից. վիճակագրություն

2021 թվականին Հայաստանից ավելի շատ քաղաքացի է մեկնել, քան ժամանել:

Վիճակագրական կոմիտեի տվյալներով, մասնավորապես, հայկական փաստաթղթերով Հայաստանից հեռացել է 762 792 քաղաքացի, եւ Հայաստան է եկել 689 221 քաղաքացի, տարբերությունը կազմել է 73 571 քաղաքացի: Նկատենք, որ Վերջին 10 տարում նման մեծ բացասական թիվ չի արձանագրվել Հայաստանում:

Ի դեպ, 2020 թվականին Հայաստանից մեկնողների եւ ժամանաողների տարբերությունը եղել է դրական: Ժամանողները 42 786-ով ավելի են եղել:

Նշենք, որ 762 հազար հեռացողներից 533 հազարը հեռացել է «Զվարթնոց» օդանավակայանով, 119 հազարը՝ Բագրատաշենի անցակետով, 43 հազարը Գյումրիի օդանավակայանով:

Նշենք նաեւ, որ Հայաստանի մշտական բնակչությունը եւս նվազել է, եթե 2020-ի վերջին ՀՀ բնակչությունը կազմել է 2 963.3 հազար մարդ, ապա 2021-ի վերջին՝ 2 961.0 հազար մարդ:

Թեեւ մասնագետները նշում են, որ Հայաստանից մեկնողների եւ ժամանողների տարբերությունը չի կարելի համարել արտագաղթ, քանի որ շատերը մեկնում են աշխատելու, երբեմն մեկ տարուց երկար ժամանակով, հետո վերադառնում են, սակայն 73 հազար բացասական տարբերությունը բոլոր դեպքերում մտահոգիչ է: