Սուրբ Ղազանչեցոցը ցանկանում են հանձնել ուղղափառ եկեղեցուն

«Ինտերֆաքս-Ադրբեջանը» երեկ գրել էր, որ Ադրբեջանի նախագահ Իլհամ Ալիևը հայտարարել է, թե Երևանի և Բաքվի միջև պետք է լինի խաղաղության համաձայնագիր: «Իհարկե, Հայաստանի և Ադրբեջանի միջև պետք է լինի խաղաղության պայմանագիր։ Այն պետք է ստորագրվի իրավունքի միջազգային նորմերի և սկզբունքների հիման վրա՝ երկրների տարածքային ամբողջականության փոխադարձ ճանաչման պայմանով», - ասել էր Ալիևը` Աղդամի շրջան կատարած այցի ժամանակ։ Նա նշել էր` «ադրբեջանական ժողովուրդը և ոչ ոք երբեք չպետք է մոռանա հայերի կատարած վայրագությունները»։

Ալիևը նաև վստահություն էր հայտնել, որ այն աշխատանքը, որը ներկայում կատարում է Ադրբեջանը ռազմական շինարարության ոլորտում «ավելի կամրապնդի երկիրը և պատասխան կլինի Հայաստանի ռեւանշիստական ուժերին»։ «Մենք մեր հողերում ենք։ Արյուն թափելով վերադարձանք այս հողերը։ Մենք ամուր կանգնած ենք այս հողերի վրա և ապրելու ենք այստեղ։ Ղարաբաղը Ադրբեջան է», - ասել էր Ալիևը։

Ադրբեջանագետ Անժելա Էլիբեգովայի խոսքով` Ալիեւի այս հայտարարությունը նորություն չէ: «Ալիեւն ամիսը երկու անգամ կրկնում է այս տեքստը»- նշում է նա:

Իսկ հայկական կողմն ինչո՞ւ չի արձագանքում Ալիեւի հայտարարություններին, Անժելա Էլիբեգովան ասում է. «Սա նոր թեմա չէ, հասարակությանը հնարավորինս փորձում են նախապատրաստել, իսկ Նիկոլն ասում է, որ ինքը եւս պատրաստ է գնալ խաղաղության»:

Այն հարցին, թե` ինչպե՞ս է ստացվում, որ թշնամի Ադրբեջանը հիմա էլ փորձում է «ալբանիզացնել» Դադիվանքը, մեր զրուցակիցը նշեց. «Սուրբ Ղազանչեցոցն էլ ցանկանում են հանձնել ուղղափառ եկեղեցուն եւ դրա մասին արդեն սկսել են խոսել»:

Հարցին, թե ի՞նչ կարող է անել հայկական կողմն իրավիճակը փրկելու համար, Անժելա Էլիբեգովան նշեց. «Շատ բան կարող է անել, պարզապես ցանկության հարց է: Հայկական կողմը կարող է դիմել ՄԱԿ-ին, ՅՈՒՆԵՍԿՕ-ին, հարցը բարձրացնել նաեւ Մինսկի խմբում, մի խոսքով դիմել բոլոր այն միջազգային կառույցներին, որոնք զբաղվում են պատմամշակութային արժեքների պահպանմամբ: Հարցը կարող է բարձրացնել նաեւ Մայր Աթոռը»: