«Դա քարոզչություն անելու տեղ չէր, հակաքարոզչությունն է ակտիվ սկսվել». Ավինյանը` իր աղմկահարույց հայտարարության մասին

Երեկ ես այցելել էի Սուրմալու, որպեսզի տեսնեի այդ ողբերգության մասշտաբների չափն իմ աչքերով եւ հասկանայի, թե ինչն է եղել սկզբնապատճառը: Այս մասին Հանրային հեռուստաընկերության Պետրոս Ղազարյանի հետ հարցազրույցում ասել է «Քաղաքացիական պայմանագիր» կուսակցության վարչության անդամ Տիգրան Ավինյանը:

«Շփվել եմ ԱԻՆ աշխատակիցների հետ, ծաղիկներ եմ նաեւ խոնարհել այնտեղ եւ շատ բովանդակային զրույց եմ ունեցել լրագրողների հետ հրդեհային անվտանգության մասին, հրավառությունների մասին, այլեւայլ հարցերի մասին, քաղաքական հայտարարություն, կարելի է ասել, որպես այդպիսին չի եղել, մի լրագրող 3 անգամ հարցնում է` դուք Երեւանի քաղաքապետի թեկնածու եք, ես ասում եմ` այո, դա այդպես է, բայց այդ հայտարարության մասին չէր այդ օրը, այդ օրը  կարծում եմ, դեպքը քննարկելու առիթ էր, հրդեհային անվտանգության կանոնները քննարկելու առիթ էր եւ հրավառությունները արգելելու մասին քննարկելու առիթ էր»,-ասաց նա:

Ավինյանը նշում է, որ դա քարոզչություն անելու տեղ չէր եւ, ընդհակառակը, հակաքարոզչությունն է ակտիվ սկսվել: Նա նաեւ նշեց, որ եթե որեւէ բան չփոխվի` Երեւանում ավագանու ընտրություններ կանցկացվեն հաջորդ տարի` աշնանը:

Հիշեցնենք, որ նախօրեին Տիգրան Ավինյանը այցելել էր «Սուրմալու» առեւտրի կենտրոն` պայթյունի վայր, որտեղ հայտնել էր, որ ինքն այնտեղ է գտնվում որպես ՔՊ քաղաքապետի թեկնածու: