Coca-Cola-ն եվրոպական շուկայից հետ է կանչում ըմպելիքները՝ քիմիական քլորատի բարձր մակարդակի պատճառով

Coca-Cola-ի եվրոպական ստորաբաժանումը (Coca-Cola Europacific Partners Belgium) զանգվածաբար հետ է կանչել հայտնի ըմպելիքների խմբաքանակներ՝ դրանցում թունավոր քլորատների բարձր մակարդակի պատճառով, հայտնում է The Guardian-ը՝ մանրամասնելով, որ սա վերաբերում է Coca-Cola, Sprite, Fanta, Fuze Tea, Minute Maid, Tropico ապրանքանիշերի՝ տարաներով և շշերով ըմպելիքներին, որոնք շրջանառության մեջ են գտնվում 2024 թվականի նոյեմբերի վերջից։  

Ըմպելիքները վաճառվել են Բելգիայում, Նիդեռլանդներում, Մեծ Բրիտանիայում, Գերմանիայում, Ֆրանսիայում և Լյուքսեմբուրգում։ 

Խնդիրը բացահայտվել է Coca-Cola-ի՝ Գենտում գտնվող արտադրամասում պլանային ստուգման ժամանակ:

«Մենք հստակ թիվ չունենք, բայց ակնհայտ է, որ  խոսքը մեծ թվի մասին է», - AFP-ին ասել է Coca-Cola Europacific Partners Belgium-ը: Coca-Cola-ի եվրոպական ստորաբաժանումը վստահեցրել է, որ ըմպելիքների մեծ մասը, որոնցում քլոր է հայտնաբերվել, արդեն հանվել են խանութների դարակներից։ 

Coca-Cola-ի ներկայացուցիչը BBC-ին ասել է. «Անկախ փորձագիտական ​​վերլուծությունը եզրակացնում է, որ սպառողների համար ցանկացած ռիսկ շատ ցածր է»: