Եվս մեկ հայկական թիմ՝ ՈՒՀԱ-ի բեմում. «Փաստ»
«Փաստ» օրաթերթը գրում է.
Տարիներ շարունակ հայերն ու հայկական թիմերը ճանաչված են եղել «Ուրախների և հնարամիտների ակումբի» (КВН) մրցումներում: Վերջին տարիներին մասնակցությունը էապես նվազել է, սակայն, ինչպես երևում է, սառույցն սկսել է շարժվել:
Այս տարի հունվարի 12-ից 25-ը Սոչիում անցկացված ՈՒՀԱ ամենամյա փառատոնին մասնակցել է նաև վեց հոգանոց հայկական թիմ: Ի դեպ, փառատոնին մասնակցել է 500-ից ավելի թիմ Ռուսաստանից և ԱՊՀ այլ երկրներից:
Մոսկվայում ստեղծված «Emporio Armяне» հայկական թիմի ավագը՝ Զորիկ Ապոզյանն ասում է, որ, նպատակն առաջին հերթին ճանաչելիություն ձեռք բերելն էր, բայց գլխավոր նպատակը Բարձրագույն լիգայում ելույթ ունենալն է. «ՈՒՀԱ-ում հանդես եկող յուրաքանչյուր թիմի նպատակը մեկն է՝ հասնել Բարձրագույն լիգա: Հայկական թիմերի համար նպատակը նաև Comedy Clubում հայտնվելն է, այս պարագայում՝ որքանով բախտդ կբերի: Իհարկե, հիմնական նպատակը Բարձրագույն լիգան է, կան նաև հեռուստատեսային Պրեմիեր լիգան և Առաջին լիգան: Լիգաները տարբեր են ու շատ, բայց բոլորի երազանքը հենց Բարձրագույն լիգայում հանդես գալն ու հաղթելն է»:
Հասկանալի է, որ նման փառատոններին ու մրացույթներին մասնակցելը, մեղմ ասած, «էժան հաճույք» չէ: Մեր տեղեկություններով, թիմին աջակցել է Ռուսաստանի հայերի միությունը: Թիմի ավագը «Փաստի» հետ զրույցում հաստատեց այդ տեղեկությունը՝ նշելով, որ դիմել են ՌԴ Պետդումայի Ազգային հարցերով հանձնաժողովի փորձագետ, Ռուսաստանի հայերի միության վարչության անդամ, ՌՀՄ նախագահի՝ Մոսկվայում և Մոսկվայի նահանգում լիազոր ներկայացուցիչ Արտյոմ Վարդանյանին, որն արագ արձագանքել է իրենց խնդրանքին: «Փառատոնին մասնակցելը ֆինանսապես այնքան էլ հեշտ չէ, իսկ մենք ուսանողներ ենք, և անկեղծ լինեմ՝ այդքան գումար չունենք: Ռուսաստանի հայերի միությունը հոգաց մեր՝ Սոչի մեկնելու և այնտեղ մնալու ծախսերը, ինչի համար շատ շնորհակալ ենք: Հենց այս աջակցության շնորհիվ կարողացանք մասնակցել այս փառատոնին»:
Ի դեպ, Զորիկ Ապոզյանը նշում է՝ բավականին ծանր է ելույթ ունենալ այն իրադարձությունների ֆոնին, որոնք վերջին տարիներին տեղի են ունենում Հայաստանում, Ռուսաստանում և ամբողջ աշխարհում. «Հումորը կարող է օգտակար լինել մարդկանց համար՝ մի քիչ շեղելու նրանց այն իրականությունից, որն այսօր ունենք: КВН-ը օգնում է միավորվել: Կարծում եմ՝ բոլորս ենք ուզում ապրել մի աշխարհում, որտեղ չկան տարաձայնություններ»:
Մանրամասները՝ «Փաստ» օրաթերթի այսօրվա համարում
Սմոլենսկի մարզի Ռուդնյա քաղաքում հանդիսավորությամբ բացվեց բարեկամության, հավատքի և ժողովուրդների հոգ...
«Ատոմ՝ ապագայի էներգիա». Երևանում անցկացվել է առաջին ազգային երիտասարդական միջուկային երկխոսությունը...
Իշխանությունները ցանկանում են եկեղեցին դարձնել սովորական կրոնական կազմակերպություն. Արեգ Սավգուլյան
ԵՄ ներկայիս ղեկավար կազմը ոչ ոքի մեջ վստահություն չի ներշնչում. Հրայր Կամենդատյան
«Եթե պետական հիշողությունը, ազգային իղձերը կորցնում ենք, այդ դեպքում ի՞նչն ենք պաշտպանում». «Փաստ»
Կոռուպցիոն սկանդալի հետքերով. ինչպես են պետական միջոցները վատնվել աստղաբաշխական գներով. «Փաստ»
Նիկոլ Փաշինյանի վարած կառավարման և Ադրբեջանին արվող զիջումների հետևանքով Հայաստանը կանգնում է անվտա...
Փաշինյանն ի զորու չէ ոչնչացնելու եկեղեցին և մեր հավատն առ Աստված. Ավետիք Չալաբյան
ԶՊՄԿ ՓԲԸ գլխավոր տնօրեն Ռոման Խուդոլին շնորհավորել է «Լիդիան Արմենիա» ընկերությանը արտադրության մեկն...
Երբ ջնջվում է... ոգին. «Փաստ»