Եթե ՀՀ-ն միանա ԵՄ-ին, Բրյուսելը կասի՝ փակե՛ք ձեր երկինքը ՌԴ ինքնաթիռների համար. դուք այլընտրանք չեք ունենա. Օվերչուկ

Ռուսաստանը մտավախություն ունի, որ Հայաստանի եվրոպական ինտեգրացիայի խորացումը կարող է հանգեցնել երկրի օդային տարածքի փակմանը ռուսական ինքնաթիռների համար, ինչն ավելի վաղ արել է Եվրամիությունը։ Այս մասին հայտարարել է Ռուսաստանի փոխվարչապետ Ալեքսեյ Օվերչուկը՝ ելույթ ունենալով Սանկտ Պետերբուրգի միջազգային տնտեսական ֆորումի (ՍՄՏՖ) նիստում։ Այս մասին գրում է ՏԱՍՍ-ը:

«Տեսեք, մենք այս պահին Եվրամիության հետ օդային կապ չունենք։ Եվրամիությունը փակել է իր երկինքը ռուսական ինքնաթիռների համար։ Արդյոք Հայաստանը նույնպես կփակի՞ իր երկինքը։ Եթե դուք միանաք Եվրամիությանը, ապա այո՛, որովհետև Բրյուսելը ձեզ կասի՝ փակե՛ք ձեր երկինքը, և դուք կփակեք ձեր երկինքը, և դուք այլընտրանք չեք ունենա։ Եվ ի՞նչ», - ասել է նա։

Փոխվարչապետը նշել է, որ հնարավոր սահմանափակումը կազդի զգալի թվով չվերթների վրա, և բեռնափոխադրման համակարգը նույնպես կարող է խափանվել։

«Բոլոր հարյուրավոր չվերթները շաբաթական ո՞ւր են գնալու։ Դե, դրանք, իհարկե, կանցնեն Թբիլիսիով... Նույնը վերաբերում է սահմանին տեղի ունեցող տեղափոխումներին. հայկական բեռնատարը կհասնի Վերին Լարս, այնուհետև բեռը կտեղափոխվի բելառուսական կամ ռուսական բեռնատարի մեջ, որը կտանի բեռը Ռուսաստան, իսկ հայաստանցի վարորդը կվերադառնա Հայաստան։ Ահա թե ինչ կարող է իրականում պատահել», - ասել է նա։