Խլված, գողացած մանկապարտեզների թվի գումարը հաշվեք ու ասեք՝ «ԱՆԻՖ»-ի 25 մլրդից մե՞ծ է, թե՝ փոքր. Սամվել Հակոբյան

«Մայր Հայաստան» խմբակցության ներկայացուցիչն ու քաղաքային ակտիվիստը մանկապարտեզում բացահայտում են ակնհայտ կոռուպցիա, ակտիվիստին կանչում, հայհոյում, տփում, ճամփում եք, հիմա  էլ մանկապարտեզների հարցով հանձնաժողով եք բացում: Այս մասին Երևանի քաղաքապետարանի ավագանու նիստին հայտարարեց «Մայր Հայաստան» խմբակցության անդամ Սամվել Հակոբյանը:

«Ախր այս մարդիկ 2018 թվին ձեր կուտը կերան, որովհետև մտածում էին՝ դուք էդ տարածքները հետ եք բերելու: Մի հատ էդ սաղ խլված, գողացված, օտարված մանկապարտեզները կալկուլյատորով հաշվեք ընդհանուր ինչքա՞ն գումար է եղել ու Տիգրան Ավինյանի ղեկավարած ԱՆԻՖ-ի 25 միլիարդ դրամը ասեք՝ դրանից մե՞ծ է, թե՝ փոքր: Այդ 25 միլիարդը հետ բերեք, քաղաքում ամեն շենքի տակ մանկապարտեզ կկարողանանք բացել»,- ասաց նա:

Նա նշեց, որ այս նախաձեռնությամբ իշխանությունն իր իսկ գործադիր թևին, ասում է, որ դու ոչ մի բան ես: «Որովհետև եթե պետությունում կա հակակոռուպցիոն, դատախազություն, ոստիկանություն, ԱԱԾ, այդ բոլորը չեն կարողացել այս յոթ տարում որևէ բան օտարել, Արմեն Գալջյանը հեսա գալիս է հանձնաժողով ու սաղ հետ բերի: Ոնց ԱԺ-ում 44 օրյա պատերազմի հանձնաժողով բացեցիք, Անդրանիկ Քոչարյանը դրեցիք գլխին, դրա համար մինչև այսօր ոչ դավաճան ունենք, ոչ մի բան չունենք, միամիտ պատերազմ ենք պարտվել, միամիտ 5000 հոգի մահացել է»,- հայտարարեց Հակոբյանը: