Անհուսալի վարկեր ունեցող անձանց աջակցության ծրագրին կարող են դիմել նաև չլիցենզավորված բանկերում և վարկային կազմակերպություններում անհուսալի վարկեր ունեցողները, ուժային կառույցներում նոր ծառայության անցնող անձինք, ինչպես նաև գործող ծառայողները

Այսուհետ ՀՀ կենտրոնական բանկի կողմից չլիցենզավորված բանկերում և վարկային կազմակերպություններում անհուսալի դասով դասակարգված վարկեր ունեցող անձինք ևս կարող են օգտվել Անհուսալի վարկեր ունեցող անձանց աջակցության ծրագրից։ Այս մասին հայտնում են ԱՍՀ նախարարությունից:

Ծրագրի շրջանակում դիմում կարող են ներկայացնել նաև ՀՀ ազգային անվտանգության ծառայությունում և ՀՀ պաշտպանության նախարարությունում նոր ծառայության անցնող անձինք, ինչպես նաև գործող ծառայողները։

Հիշեցնենք, որ Անհուսալի վարկեր ունեցող անձանց աջակցության ծրագրից կարող եք օգտվել, եթե բանկերում և վարկային կազմակերպություններում (անկախ նրանից լիցենզավորված է, թե ոչ) ունեք 3 և ավելի տարի անհուսալի դասով դասակարգված վարկ և եթե Ձեր ունեցած բոլոր վարկերի մայր գումարների հանրագումարը դիմելու օրվա դրությամբ փոքր է 1 մլն դրամից։ Դիմելու օրվա դրությամբ պետք է լինեք աշխատող, այսինքն՝ Ձեր աշխատավարձից պետք է հաշվարկվի եկամտահարկ, որն էլ ուղղվելու է անհուսալի վարկային պարտավորության ամսական մարմանը։

Շահառու ճանաչվելու դեպքում աշխատավարձից վարկի սպասարկման համար Հարկադիր կատարումն ապահովող ծառայության կողմից բռնագանձվող գումարի չափը սահմանվել է 20%՝ 24 ամսից ոչ ավելի ժամկետով (այժմ սահմանված մինչև 50%-ի փոխարեն)։

Դիմումներն ընդունվում են https://e-social.am/services հարթակում։

Ծրագրից օգտվելու քայլերի հաջորդականությունը՝ ստորև․

ՔԱՅԼ 1։ Մուտք գործել https://e-social.am/services հարթակ,

ՔԱՅԼ 2։ Սեղմել «Կյանքի դժվարին իրավիճակ» պատուհանի վրա, այնուհետև ընտրել «Անհուսալի վարկերի միջոցառում» դաշտը,

ՔԱՅԼ 3։ Ձեր տվյալների նույնականացման համար համակարգը Ձեզ կառաջարկի ընտրել «Բջջային նույնականացման քարտ» (mID) կամ «Նույնականացման քարտ» տարբերակներից որևէ մեկը,

ՔԱՅԼ 4։ «Բջջային նույնականացման քարտ» (mID) տարբերակն ընտրելու դեպքում անհրաժեշտ է մուտքագրել Ձեր հեռախոսահամարը և սեղմելով «Մուտք» դաշտի վրա՝ ստանալ ստորագրման PIN գաղտնաբառը։ «Նույնականացման քարտ» տարբերակի դեպքում՝ անհրաժեշտ է նույնականացման քարտը տեղադրել ընթերցող սարքի մեջ, սեղմել «Մուտք» դաշտի վրա, հավաքել մուտքի PIN գաղտնաբառը և մուտքագրել պահանջվող տեղեկատվությունը։

Ուշադրություն․

Բջջային նույնականացման քարտ (mID) և նույնականացման քարտ չունեցող անձինք կարող են մոտենալ Միասնական սոցիալական ծառայության տարածքային կենտրոններ (հասցեները՝ https://socservice.am/offices ):