Մաքսատուրքից ազատման արտոնություն՝ Մասիսում խախտումներով գործող խնդրահարույց մետաղաձուլական ընկերության համար

Կառավարության այսօրվա նիստում էկոնոմիկայի նախարարությունն առաջարկում է բավարարել «ՋՄԵՏԱԼ ԹՐԵՅԴԻՆԳ ԿՈՄՊԱՆԻ» սահմանափակ պատասխանատվությամբ ընկերության կողմից ներկայացված հայտը գերակա ոլորտում իրականացվող ներդրումային ծրագրի շրջանակներում ներմուծվող տեխնոլոգիական սարքավորումների, դրանց բաղկացուցիչ ու համալրող մասերի, հումքի և (կամ) նյութերի նկատմամբ սակագնային, մասնավորապես, ներմուծման մաքսատուրքից ազատելու արտոնությունից օգտվելու համար և սահմանված կարգով կիրառել համապատասխան արտոնությունը համաձայն հավելվածի ներմուծվող տեխնոլոգիական սարքավորումների, դրանց բաղկացուցիչ ու համալրող մասերի, հումքի և (կամ) նյութերի նկատմամբ: 

Նախագծի հիմնավորման մեջ նշվում է, որ «ՋՄԵՏԱԼ ԹՐԵՅԴԻՆԳ ԿՈՄՊԱՆԻ» սահմանափակ պատասխանատվությամբ ընկերության կողմից ներմուծվող հումքը նախատեսվում է օգտագործել պողպատի շարունակական ձուլման արդյունքում ստացված քառակուսի կիսապատրաստուկների արտադրության համար։ Արտադրությունն իրականացվելու է ՀՀ Արարատի մարզում։

Ընկերությունը հիմնադրվել է 2020 թվականին։ Ծրագրի շրջանակներում նախատեսվում է իրականացնել 1․8 մլրդ (ներառում է նաև ներմուծվող հումքի արժեքը) դրամի ներդրում հումքի ձեռքբերման համար։

Ներկայումս առկա է 78 աշխատատեղ 105 հազ դրամ միջին ամսական աշխատավարձով։ Ներդրումային ծրագրի շրջանակներում մինչև 2028 թվականը նախատեսվում է աշխատատեղերի քանակը հասցնել մինչև 120-ի՝ 110 հազ դրամ միջին ամսական աշխատավարձով։

Նշենք, որ այս ընկերության մասին մամուլում խնդրահարույց հրապարակումներ կան։ 

Օրինակ՝ 2024 թվականի դեկտեմբերին Բնապահպանության և ընդերքի տեսչական մարմին ահազանգ էր ստացվել Մասիս քաղաքի կայարանի հարակից տարածքում գործող ձուլարանից արտանետվող թանձր ծխի վերաբերյալ։ 

Տեսչական մարմնի աշխատակիցները գնացել են ահազանգի հետքերով և պարզել են, որ «ՋՄԵՏԱԼ ԹՐԵՅԴԻՆԳ ԿՈՄՊԱՆԻ» ՍՊԸ-ին պատկանող Արարատի մարզի Մասիս համայնքի արդյունաբերական գոտում գործող մետաղաձուլման գործարանը ձուլման աշխատանքներն իրականացնում է փորձաքննական պահանջների խախտմամբ։ Խախտումներով իրականացվող աշխատանքները դադարեցվել են։ Մարմինը խոստացել է կիրառել պատասխանատվության միջոցներ։

Ու հիմա այս ընկերությանը, որը խախտումներով է իրականացնում մետաղաձուլական աշխատանքները, մաքսատուրքից ազատման արտոնություն է տրամադրում։

Ի դեպ, այս արտոնությունը ստանալուց հետո ընկերությունը խոստանում է իր աշխատակիցների միջին աշխատավարձը 105 հազ դրամից դարձնել 110 հազ դրամ, այսինքն՝ մի ամբողջ 5000 դրամով ավելացնել։ Նկատենք, որ սա ծիծաղելի աշխատավարձ է մետաղաձուլական գործարանում աշխատելու համար, քանզի այլ համանման ընկերություններում աշխատավարձը զգալիորեն ավելի բարձր է։ Հավանաբար ինչ-որ նիկոլականի կամ իշխանամերձ գործարարի պատկանող ընկերություն է սա, դրա համար էլ համաձայնել են արտոնություն տրամադրել՝ անտեսելով բազմաթիվ խնդիրներն ու թերությունները։

Վահե Մակարյան