Մալթայի պատճառով ԵՄ-ն չի կարողանում համաձայնության գալ հակառուսական պատժամիջոցների 18-րդ փաթեթի շուրջ․ Politico

Կիրակի օրը կայացած ԵՄ մշտական ներկայացուցիչների կոմիտեի նիստի ժամանակ Մալթայի ներկայացուցիչները դժգոհություն են հայտնել ռուսական նավթի արտահանման գների շեմ սահմանելու Եվրահանձնաժողովի առաջարկի վերաբերյալ, որը վերջին երեք ամսվա միջին ցուցանիշով հաշվարկված շուկայական արժեքից ցածր է 15%-ով։  Այս մասին հայտնել է Politico պարբերականը՝ հղում անելով եվրոպացի դիվանագետի։

Reuters-ը, հղում անելով աղբյուրներին, հաղորդել է, որ ԵՄ-ն քննարկում է մեկ բարելի համար 47 դոլար գինը՝ հիմնվելով վերջին 22 շաբաթվա ընթացքում ռուսական հումքի միջին արժեքի վրա (հանած 15%): Գործակալության աղբյուրը պնդել է, որ մակարդակը կվերանայվի յուրաքանչյուր վեց ամիսը մեկ: Սլովակիան, իբր, համաձայնել է Ռուսաստանից նավթի գնի առաջարկվող իջեցմանը, բայց փորձում է ԵՄ-ից երաշխիքներ ստանալ ռուսական գազի ապագա գնումների վերաբերյալ, գրում է Reuters-ը:

Եվրահանձնաժողովը մայիսին խոստացել է ԵՄ պատժամիջոցների 18-րդ փաթեթում ներառել ռուսական նավթի գնի շեմի իջեցումը 60 դոլարից մինչև 45 դոլար՝ մեկ բարելի դիմաց, սակայն Սլովակիան և Հունգարիան դեմ են արտահայտվել, իսկ Էստոնիան հայտարարել է, որ կկասեցնի փաթեթը, եթե շեմը չիջեցվի։ Միացյալ Նահանգները դեռևս չի պատասխանել, թե արդյոք պատրաստ է աջակցել այս միջոցառմանը «Յոթի խմբի» (G7) շրջանակներում: