Երբ առաջին պլանին հաստատակամությունն է

Մարզական ավանդույթներ ունեցող Քաջարանում օլիմպիական մարզաձև բռնցքամարտը մինչև վերջերս կենդանութան նշաններ ցույց չէր տալիս: Ըստ ամենայնի սառույցը կոտրվել է. լեռնագործների քաղաքն էլ այդ մարզաձևում ունի հանրապետության երիտասարդական առաջնության բրոնզե մեդալակիր: Վերջերս նման հաջողության է հասել Վահագն Աթայանը 71 կգ քաշայինների մրցապայքարում, որին մասնակցում էին 14 բռնցքամարտիկ:

Ահա վեց տարի է, ինչ Վահագնը պարապում է այդ մարզաձևով բռնցքամարտի մարզիչ Աշոտ Սադխյանի մոտ, մինչ այդ երկու տարի էլ  ըմբշամարտով  է զբաղվել: Թվում էր, թե պապի՝ ըմբշամարտի ճանաչված մարզիչ Մերուժան Աթայանի հետքերով պիտի գնար, բայց նախընտրեց բռնցքամարտը։

Հանրապետությունում բռնցքամարտի պատանիների առաջնությունում նա ևս երկու անգամ մրցանակի է արժանացել, երկու դեպքում էլ մեդալը բրոնզե փայլ ուներ: Ինչևէ, Վահագնը հատկապես որոշել է զբաղվել ուժեղների և ճարպիկների այդ մարզաձևով և այսուհետև պարապմունքներն անցկացնելու է Երևանում՝ ճանաչված մարզիչ Արթուր Մելքոնյանի գլխավորությամբ:

Օրեր առաջ Քաջարանի համայնքապետ Մանվել Փարամազյանն ընդունել է Վահագն Աթայանին, նրա մարզիչ և Սյունիքի մարզի բռնցքամարտի ֆեդերացիայի նախագահ Աշոտ Սադխյանին, Քաջարանի սպորտի երախտավորներից Մերուժան Աթայանին: Համայնքի ղեկավարը մրցանակակիր մարզիկին  խրախուսեց պատվոգրով, դրամական պարգևով  և«Քաջարան» գրքով:

Խմբագրությանը այս տվյալները տրամադրեց Մերուժան Աթայանը, ով երախտագիտություն հայտնեց Զանգեզուրի պղնձամոլիբդենային կոմբինատի տնօրենությանը (գլխավոր տնօրեն՝ Ռոման Խուդոլի) և «Քաջարան» բարեգործական հիմնադրամին (տնօրեն՝ Արմեն Ստեփանյան), միշտ մարզիկների կողքին լինելու համար, մրցումներին և ուսումնամարզական հավաքներին մասնակցությունը հովանավորելու համար: Իսկ դա մարզիկին չափազանց անհրաժեշտ է մրցափորձ ձեռք բերելու համար:

«Սյունյաց երկիրը» երիտասարդ ու խոստումնալից մարզիկին մաղթում է մարզական նոր հաջողություններ:

Վահրամ Օրբելյան