Եվրաեռյակը հայտարարել է Իրանի դեմ նոր պատժամիջոցներ սահմանելու պատրաստակամության մասին․ FT

Մեծ Բրիտանիան, Գերմանիան և Ֆրանսիան նամակ են ուղարկել ՄԱԿ-ին, որում ասվում է Իրանի դեմ նոր պատժամիջոցներ կիրառելու իրենց պատրաստակամության մասին։ Դա կլինի այն դեպքում, եթե Թեհրանը չվերսկսի իր միջուկային ծրագրի շուրջ բանակցությունները։ Այս մասին հայտնում է բրիտանական Financial Times պարբերականը։

ՄԱԿ-ի գլխավոր քարտուղար Անտոնիու Գուտերեշին ուղղված նամակը ստորագրել են Ֆրանսիայի արտգործնախարար Ժան-Նոել Բառոն, Գերմանիայի արտգործնախարար Յոհան Վադեֆուլը և Մեծ Բրիտանիայի արտգործնախարար Դևիդ Լեմին։ Փաստաթղթում ասվում է, որ «եվրաեռյակը» առաջարկել է Իրանին երկարաձգել պատժամիջոցների կասեցումը, որպեսզի խուսափեն օգոստոսին դրանց ավտոմատ վերսկսումից։

Փարիզը, Բեռլինը և Լոնդոնը հստակ հասկացրել են, որ եթե Թեհրանը մինչև օգոստոսի վերջ չցանկանա դիվանագիտական լուծման հասնել կամ չօգտվի երկարաձգման հնարավորությունից, ապա կգործարկվի snapback մեխանիզմը, ասվում է նամակում։

Հուլիսին Եվրաեռյակը սպառնացել է Իրանին նոր պատժամիջոցներով, այն բանից հետո, երբ Թեհրանը դադարեցրել է համագործակցությունը Միջազգային ատոմային էներգիայի գործակալության (ԱԷՄԳ) հետ՝ իրանական միջուկային օբյեկտներին Իսրայելի և ԱՄՆ-ի հարվածներից հետո: Ավելի ուշ Իրանը համաձայնվել է վերսկսել միջուկային բանակցությունները Մեծ Բրիտանիայի, Գերմանիայի և Ֆրանսիայի հետ, որոնք տեղի են ունեցել Թուրքիայում՝ հուլիսի վերջին: