Բյուջեի պակասուրդը 2.7 մլրդ դրամով ավելացել է. Փաշինյանը երկիրը պարտքով է պահում. «Ժողովուրդ»

«Ժողովուրդ» օրաթերթը գրում է. «Պետական բյուջեն ընտանիքի դրամապանակն է, իսկ նայելով անցած կես տարվա թվերին՝ պետք է արձանագրել, որ մեր «ընտանիքում» փող չկա։ Ավելին՝ կա պակաս, ու այդ պակասը շարունակում է խորանալ։

«Ժողովուրդ» օրաթերթը Հայաստանի ազգային վիճակագրական կոմիտեից պարզեց, որ 2025 թվականի հունվարից հուլիսը ներառյալ պետական բյուջեն արձանագրել է շուրջ 60.7 միլիարդ դրամ պակասուրդ, ինչը նախորդ տարվա նույն ժամանակահատվածի համեմատ ավելի է 4.6%-ով կամ 2.7 միլիարդ դրամով։

Այսինքն՝ այն, ինչ ուներ բյուջեն, չի բավականացրել. պետությունը ավելի շատ ծախսել է, քան հավաքել։ Եվ այս վիճակը արդեն վաղուց ոչ թե ճգնաժամային է, այլ կառավարման համակարգի ձախողման արդյունք։

Փաշինյանի իշխանությունը վաղուց է դարձրել պետությունը պարտքի ռեժիմով աշխատող տնտեսություն։ Արտաքին պարտքն աճում է, պակասուրդը՝ նույնպես։ Մի կողմից խոսում են տնտեսական աճից, մյուս կողմից բյուջեն լցվում է ոչ թե տնտեսությամբ՝ այլ նոր պարտքեր վերցնելով. սա խաբեություն է քաղաքական փաթեթավորմամբ։

Փոխանակ կրճատելու ծախսերն ու վերանայելու կառավարման մոտեցումները՝ իշխանությունը վարժվել է ապրել ուրիշի փողերով՝ օտար վարկով, դոնորներով ու ժողովրդի ծով համբերությամբ»։

Մանրամասները՝ «Ժողովուրդ» օրաթերթի այսօրվա համարում: