Հարցաքննվել է ԱԱԾ-ի ուղղությամբ «Մոլոտովի կոկտեյլ» նետած տղամարդու հայրը. «Հրապարակ»

Տեղեկացանք, որ դատարանը 2 ամսով կրկին երկարաձգել է Մանդալյանի խափանման միջոցը, նա շարունակում է կալանքը կրել «Նուբարաշեն» քրեակատարողական հիմնարկում։ Վաղն էլ նախաքննական մարմինը պատրաստվում է նախաքննության ավարտ հայտարարել, գործը մեղադրական եզրակացությամբ ուղարկել դատախազին, որպեսզի վերջինս հաստատի եւ ուղարկի դատարան՝ դատաքննության։ Մանդալյանը գործով միակ մեղադրյալն է, ըստ լուրերի, գործի ընթացքում հարցաքննվել է նաեւ նրա հայրը, որի հետ էլ նա ապրելիս է եղել։ Հայրն ասել է, որ որդին ունի հոգեկան առողջության խնդիրներ, ինչը դրսեւորվել է նրա վարքագծում՝ համատեղ կենցաղ կիսելու ընթացքում։

Րաֆֆիի պաշտպան Հրաչ Առաքելյանը «Հրապարակ»-ին ասաց, որ քննիչին միջնորդել են դատահոգեբանական փորձաքննություն նշանակել, սակայն մերժվել է, քանի որ հարցում են արել եւ տեսել, որ հոգեկան խնդիրներ ունենալու հետ կապված փաստաթղթեր առկա չեն, որեւէ կենտրոնում հաշվառված չէ։ Փաստաբանի խոսքով՝ իր պաշտպանյալը մեղադրանքը չի ընդունում, ասել է, որ այդկերպ փորձել է ուշադրություն գրավել, իր դժգոհությունն է արտահայտել․ «Նա պահանջ չի ներկայացրել, նույնկերպ կարող էր, օրինակ, կառավարության շենքի մոտ ինքնահրկիզում անել»։