Ողբերգություն Հունաստանում. վթարից մահացել է ազգային հավաքականի նախկին ֆուտբոլիստը

Հունաստանի ազգային հավաքականի, իտալական մի շարք ակումբների և դանիական «Կոպենհագենի» նախկին պաշտպան Մարիոս Իկոնոմուն հիվանդանոցում մահացել է ծանր ճանապարհատրանսպորտային պատահարի հետևանքով ստացած վնասվածքներից։ Armsport.am-ի փոխանցմամբ այս մասին հայտնում են հունական լրատվամիջոցները։

Ողբերգական միջադեպը տեղի էր ունեցել մայիսի 23-ին հունական Յանինա քաղաքում։ 33-ամյա Իկոնոմուն մոտոցիկլետով բախվել էր շրջադարձ կատարել փորձող ավտոմեքենային։ Նշվում է, որ նախկին ֆուտբոլիստն ընթանալիս է եղել առանց պաշտպանիչ սաղավարտի։

Մարիոսը գանգուղեղային ծանր վնասվածքներով և կրիտիկական վիճակում տեղափոխվել էր հիվանդանոց։ Նա վիրահատության էր ենթարկվել և միացվել արհեստական շնչառության սարքին՝ վերակենդանացման բաժանմունքում գտնվելով նեյրովիրաբույժների խիստ հսկողության տակ: Չնայած բժիշկների գործադրած բոլոր ջանքերին՝ երկուշաբթի օրը հայտնի դարձավ, որ նրա կյանքը փրկել չի հաջողվել։

Իր պրոֆեսիոնալ կարիերայի ընթացքում հույն պաշտպանը հանդես է եկել հայրենի ԱԵԿ-ում և «Պանետոլիկոսում», ինչպես նաև իտալական Սերիա Ա-ն ներկայացնող «Բոլոնիայում», «Կալյարիում» և «Սամպդորիայում»։

2020-ից 2023 թվականներին նա պաշտպանել է դանիական «Կոպենհագենի» գույները՝ թիմի հետ դառնալով Դանիայի չեմպիոն։ Իկոնոմուն իր ակտիվում ուներ նաև 6 հանդիպում Հունաստանի ազգային հավաքականի կազմում: Ֆուտբոլիստը պրոֆեսիոնալ կարիերան ավարտել էր վերջերս՝ 2024 թվականին: