ԶՊՄԿ-ն ընդլայնում է իր միջազգային համագործակցությունը՝ միանալով ՄԱԿ-ի Գլոբալ պայմանագրին

Հայաստանի խոշորագույն արդյունաբերական ձեռնարկություններից մեկը՝ ԶՊՄԿ-ն, միացել է ՄԱԿ-ի Գլոբալ պայմանագրին (United Nations Global Compact)՝ վերահաստատելով կայուն զարգացման, պատասխանատու կառավարման և միջազգային լավագույն փորձի ներդրման իր հանձնառությունը։

Այս նախաձեռնությունը համարվում է կորպորատիվ կայունության ոլորտում աշխարհի ամենախոշոր հարթակներից մեկը և միավորում է հազարավոր ընկերությունների, որոնք իրենց գործունեությունը կառուցում են մարդու իրավունքների պաշտպանության, աշխատակիցների իրավունքների, բնապահպանական պատասխանատվության և թափանցիկ կառավարման սկզբունքների հիման վրա։

ԶՊՄԿ-ում ընդգծում են, որ միջազգային այս հարթակին անդամակցությունը հերթական քայլն է ընկերության երկարաժամկետ ռազմավարության շրջանակում, որի առանցքում գտնվում են արդյունավետ կառավարումը, արտադրական գործընթացների շարունակական բարելավումը, շրջակա միջավայրի նկատմամբ պատասխանատու մոտեցումը և համայնքների հետ համագործակցության զարգացումը։

Ընկերությունը նախատեսում է պարբերաբար ներկայացնել իր առաջընթացը՝ հրապարակելով համապատասխան հաշվետվություններ, որոնք հնարավորություն կտան գնահատել իրականացվող ծրագրերի արդյունավետությունն ու դրանք համեմատել ոլորտի միջազգային առաջատար կազմակերպությունների արդյունքների հետ։

Վերջին տարիներին ԶՊՄԿ-ն նաև առաջընթաց է գրանցել ESG (բնապահպանական, սոցիալական և կառավարման) ցուցանիշների բարելավման ուղղությամբ։ Ընկերության տվյալներով՝ 2022-2024 թվականներին արձանագրվել է գնահատականի զգալի աճ, ինչը վկայում է կայուն զարգացման և կորպորատիվ կառավարման ոլորտներում իրականացվող փոփոխությունների մասին։

ՄԱԿ-ի Գլոբալ պայմանագրին միանալը ԶՊՄԿ-ի համար ոչ միայն միջազգային ճանաչումը էլ ավելի մեծացնելու հնարավորություն է, այլև լրացուցիչ պարտավորություն՝ շարունակելու գործունեության կատարելագործումը՝ համաշխարհային չափանիշներին համապատասխան։

Աննա Մարգարյան