2028 թվականի հունվարի 1-ից առողջության համընդհանուր ապահովագրության շահառու կդառնան բոլոր քաղաքացիները․ Ավանեսյան

Հայաստանում 2028 թվականի հունվարի 1-ից առողջության համընդհանուր ապահովագրության շահառու կդառնան բոլոր քաղաքացիները։

«Արմենպրես»-ի հաղորդմամբ՝ այս մասին Ազգային ժողովում ՀՀ 2025 թվականի պետական բյուջեի կատարման տարեկան հաշվետվությունը ներկայացնելիս՝ ասաց առողջապահության նախարար Անահիտ Ավանեսյանը։

Նախարարի խոսքով՝ առողջության համընդհանուր ապահովագրության ներդրումը անշրջելի գործընթաց է, և այն առաջիկա տարիներին աստիճանաբար կընդլայնվի։

«Առողջության համընդհանուր ապահովագրությունը անշրջելի իրողություն է, և այն հաջորդիվ ընդլայնվելու է։ 2027 թվականին համակարգին միանալու են մինչև 200 հազար դրամ աշխատավարձ ստացողները, քաղիրավական պայմանագրերով աշխատողները, տաքսի ծառայության մեջ ընդգրկված վարորդները»,- ասաց Ավանեսյանը։

Նրա խոսքով՝ 2028 թվականին կամփոփվի համակարգին միացող բոլոր խմբերի ընդգրկման գործընթացը, և հունվարի 1-ից ապահովագրությունը կգործի բոլորի համար։

Ավանեսյանը շեշտեց, որ առողջության համընդհանուր ապահովագրությունը կներառի բոլորին, սակայն չի ծածկելու բոլոր բժշկական ծառայությունները։ Այն ընդգրկելու է առաջնային և անհրաժեշտ ծառայությունների փաթեթը։

«Առողջության համընդհանուր ապահովագրությունը ընդգրկելու է բոլորին, բայց ոչ ամեն ինչ, այլ այն անհրաժեշտ ու առաջնային ծառայությունների փաթեթը, որոնք նպատակաուղղված են մեր ժողովրդի առաջնային հանրային առողջապահական հարցերը լուծելուն»,- նշեց նախարարը։

Ավանեսյանի խոսքով՝ պետությունը շարունակելու է ընդլայնել պետական պատվերի շրջանակում քաղաքացիներին տրամադրվող ծառայությունները՝ ելնելով կարիքներից և պետական պարտավորություններից։

«Մեր քաղաքականությունն այն է, որ պետական պատվերի շրջանակներում, որքան կլինի մեր քաղաքացիների կարիքը և պետության պարտավորությունը՝ այդ կարիքը բավարարելու, պետությունը շարունակաբար ընդլայնելու է։ Մենք այդ քաղաքականությունը տանում ենք»,- ասաց առողջապահության նախարարը։