«Ժողովուրդ». Էդգար Ղազարյանը՝ ԱԺ փոխխոսնա՞կ. ընդդիմության քննարկումները շարունակվում են

«Ժողովուրդ» օրաթերթը գրում է. «Թեև հունիսի 7-ի խորհրդարանական ընտրությունների արդյունքները ընդդիմադիր ուժերի և «ընդդիմափոխության» օրակարգով ընտրություններին մասնակցած ընդհանուր յոթ քաղաքական ուժերի կողմից բողոքարկվել են, քաղաքական դաշտում շարունակում է բաց մնալ հիմնական հարցը՝ ի վերջո ընդդիմությունը կվերցնի՞ Ազգային ժողովի մանդատները, կմասնակցի՞ նոր խորհրդարանի ձևավորմանը, թե՞ կհրաժարվի դրանցից։

Մինչ Սահմանադրական դատարանում շարունակվում են ընտրությունների արդյունքների վիճարկման գործընթացները, ընդդիմադիր ճամբարում արդեն քննարկումներ են ընթանում հետագա քայլերի շուրջ։ «Ժողովուրդ» օրաթերթին հասած տեղեկությունների համաձայն՝ ընդդիմադիր շրջանակներում առավել հակված են այն տարբերակին, որ ընտրված ուժերը, ի վերջո, կվերցնեն իրենց հասանելիք մանդատները և կներգրավվեն խորհրդարանական աշխատանքներին։

Մեր աղբյուրների փոխանցմամբ՝ նույնիսկ քննարկումների ոչ պաշտոնական մակարդակում շրջանառվում են ապագա խորհրդարանական պաշտոնների վերաբերյալ տարբեր սցենարներ։ Մասնավորապես, որպես Ազգային ժողովի փոխխոսնակի հավանական թեկնածու, հիշատակվում է «Ուժեղ Հայաստան» կուսակցության ցուցակով պատգամավոր ընտրված Էդգար Ղազարյանի անունը։

«Ժողովուրդ» օրաթերթը թեմայի վերաբերյալ զրուցել է հենց Էդգար Ղազարյանի հետ։ Վերջինս, սակայն, վստահեցրեց, թե այս փուլում նման հարց օրակարգում չկա։

«Այս պահին նման քննարկում չկա, քանի որ շարունակվում է Սահմանադրական դատարանում բողոքարկման գործընթացը։ Դեռևս պարզ չէ, թե ինչ ավարտ կունենա այդ գործընթացը և, առհասարակ, ընդդիմադիր ուժերը կվերցնե՞ն մանդատները, թե՞ ոչ»,- ասաց Ղազարյանը։

Այսպիսով, մինչ ընդդիմությունը հրապարակային մակարդակում սպասում է ՍԴ որոշմանը, քաղաքական կուլիսներում արդեն քննարկվում են նաև հետընտրական հնարավոր զարգացումները։ Սակայն վերջնական պատասխանը, թե ընդդիմադիր ուժերը կմտնեն խորհրդարան, թե կշարունակեն արտախորհրդարանական պայքարը, առայժմ մնում է անորոշ»։

Առավել մանրամասն թերթի այսօրվա համարում