Հայաստանի Հաշվեքննիչ պալատը 9,9 մլրդ դրամի լուրջ խախտումներ է հայտնաբերել

Էներգետիկ ենթակառուցվածքների եւ բնական պաշարների նախարարությունում անցկացված աուդիտը ընդգրկել է 2017 թվականից մինչեւ 2018-ի սեպտեմբերի 30-ը ընկած ժամանակահատվածը: Այս մասին հոկտեմբերի 17-ին ԱԺ Ֆինանսավարկային եւ բյուջետային հարցերով մշտական հանձնաժողովի եւ Տարածքային կառավարման, տեղական ինքնակառավարման, գյուղատնտեսության ու բնապահպանության հարցերով մշտական հանձնաժողովի համատեղ նիստում՝ ավելի վաղ Էներգետիկ ենթակառուցվածքների եւ բնական պաշարների նախարարության կողմից բյուջեի մուտքերի ապահովման եւ պետական գույքի հետագա կառավարման համար հատկացված պետական բյուջեի միջոցների օգտագործման ուսումնասիրության արդյունքների մասին Հաշվեքննիչ պալատի եզրակացության քննարկման ժամանակ ասաց Հաշվեքննիչ պալատի ներկայացուցիչ Կարեն Առուստամյանը:

Նրա խոսքով՝ աուդիտ է կատարվել նաեւ «Հայաստանի բարձրավոլտ էլեկտրացանցեր» ընկերությունում։ Դրա արդյունքում կազմվել է 20 արձանագրություն։ Աուդիտի շնորհիվ հաջողվել է պարզել 9,9 մլրդ դրամի անհամապատասխանություն 29,7 մլրդ դրամ ընդհանուր գումարից։ «Ընդհանուր առմամբ, մեզ հաջողվել է գրանցել նման անհամապատասխանության 246 դեպք։ Ցավոք, ես զուտ ֆիզիկապես չեմ կարող ներկայացնել այդ բոլոր 246 դեպքերը՝ դրանք առանձին քննելով։ Դրանցից 32-ն ունեցել են զուտ ֆինանսական բնույթ»,- պարզաբանեց Առուստամյանը։ Նյութերի մի մասը, ինչպես նշեց նա, ներկայացվել է դատախազություն՝ հետագա ստուգում անցկացնելու համար։